Kico ta ofrece e huerfano of mucha indesea pa reemplaza mayor?
- Experencia di e victima ta urgi pa politiconan preveni mas horor
- Cadena perpetuo y exposicion di realidad mester frena abuso sexual
ORANJESTAD (AAN) Durante e pandemia di Covid-19, cu urgencia el a wordo transporta pa hospital. Polis a habri caminda pasobra tabata teme pa su bida.
Dos siman el a pasa den Intensive Care. No tabata tin speranza mas pero el a bolbe cas pero sin por cana.
El a bolbe siña cana y a laga e camber di morto cu el a comparti cu tres persona, cu no a sobrevivi Covid-19 atras.
Su pensamento ta, cu el a sobrevivi pasobra e tin un mision pa cumpli cune ainda. Un tempo el a trata, pero e continuidad cu tabata necesario pa su storianan evita dolor pa otro hende, no a presenta.
DIARIO durante ultimo dianan tabata den contacto directo cu Hiacintha Thijsen Trimon, cu a trata na tur forma pa husticia wordo haci cu victimanan di abusadornan sexual, cu na e momentonan aki ta fuente di tragedia cu ta destrui bida di nan victimanan inocente.
Pedofiel ta nomber di personanan cu ta conoci pa nan placer sexual ora nan abusa di mucha. Abusador sin frontera ta nomber cu mester duna un cantidad creciente di abusadornan, cu ta forma parti di e lista di delincuentenan cu ta uza forsa bruto y hasta actonan criminal pa nan haci hende nan victima.
DIARIO a atende den persona cu Hiacintha Thijsen, cu pa nos no ta un victima pero un heroe cu merece reconocemento pa e forma cu e ta pone berguensa falso un banda pa evita cu mas hende ta bira victima di monstruonan cu manera publicacionnan cientifico cu DIARIO a colecta, ta indica, ta crece durante ultimo tempo den cantidad.
A base di su experencianan Hiacintha Thijsen ta considera cu mester introduci un castigo minimo y no maximo pa crimennan sexual.
Pues no haci posibel pa duna un castigo maximo, cu a wordo automenta, pero cu den realidad ta baha considerablemente den sentencianan cu ta cay den sala di Corte, caminda Husticia mester wordo haci.
Pa Huez condena delincuente, mester di espacio den Ley y ta na Parlamento di Aruba pa tuma nota, di e publicacionnan creciente cu ta mustra kico ta e resultadonan concreto di abuso sexual di mucha, homber y muher, pero tambe muhernan cu no por defende nan mes contra agresor poco homber, cu ta busca victima cu no por defende nan mes.
Bida largo ta e castigo cu awor mester wordo considera, despues cu Covid-19 a produci un explosion di abuso, cu a laga mucha chikito den estado pa bira mama y a duna prueba di con ta mata hende na bida.
E informacionnan di Hiacintha Thijsen, cu awe na forma valiente ta splica tur e dolornan cu pa semper ta parti di victimanan di abuso sexual, ta hiba na realidadnan cu mundo no ta tene na consideracion.
Morto di tata di Hiacintha a haci cu e y su rumannan mester a wordo acomoda. El a bay resulta den seno di un familia, cu yiunan homber cu a probecha di e ocasion.
Con por ta posibel cu ta acomoda un jovencita den un cas caminda e ta rondona pa mucha homber cu a abusa di e situacion, ta keda un pregunta. E contesta a bira e dolor di un mucha abusa, manera tanto otro cu mundo aparentemente ta entrega pa despues cera wowo.
E dolor di muchanan cu ta wordo adopta actualmente dor di parehanan rond mundo, a wordo expresa na Hulanda tambe e dianan aki ora den Tweede Kamer a mustra riba e riesgo na cual ta entrega mucha cu no por defende nan mes.
Un mucha cu no por scoge pa su mes, ta wordo entrega na mayornan cu e mes no por a scoge y den e bida moderno por victimanan desespera den situacionnan cu nan no a ricibi na nan nacemento.
E hecho cu a wordo dicidi pa riba plataforma mundial, April bira e luna cu ta bati alarma pa abuso sexual di mucha, mester haya mas atencion den Parlamento y mester cuminsa cu e forma cu ta permiti pa adopta mucha, cu a bira mercancia den hopi caso manera oficialmente ta bini dilanti na hopi pais.
DIARIO lo bay publica un lista oficial di enfermedadnan fisico y mental cu por afecta mucha y transforma nan bida den un rio di dolor y agonia. Di malesanan venerico te mentenan destrui, mester papia di situacionnan cu mester urgi Parlamento pa revisa castigonan pero tambe leynan cu ta permiti pa adopta mucha sigur den exterior, loke a wordo prohibi den Tweede Kamer na Hulanda debi na e abuso cu ta wordo comete contra mucha adopta.
Na luna di April 2024 DIARIO sigur lo sigui atende uno di e fuentenan di tragedia humano cu un gratitud y reconocemento special na personanan manera Hiacintha Thijsen cu a kubra silencio pa lanta para pa castigo minimo y no maximo pa abusdornan cu ta destrui bida humano. Palabra ta na Parlamento pa actua!
Manera ya bisa, leynan mester cubri e avance di era digital cu ta e canal importante pa muchanan habri porta pa nan morto y dolor ya cu asesinonan di bienestar di hende ta sconde tras di posibilidadnan digital pa nan ataca hende inocente.
