SANTO DOMINGO: Autoridadnan Dominicano a detene y a deporta den e ultimo dos siman aki, mas di 3.800 Haitiano despues di varios razzia y operacion di Inmigracion den diferente provincia na e pais.
Autoridadnan na Republica Dominicana, incluyendo ehercito, a bisa cu nan a confisca varios vehiculo y motorcycle cu a wordo usa pa transporta e Haitianonan. Generalmente e stranheronan ta wordo deteni pa militarnan, y despues ta wordo procesa pa funcionarionan di Inmigracion pa nan wordo deporta.
E clima di instabilidad cu tin ainda na Haiti despues di e asesinato di President Jovenel Moïse a provoca un aumento den e cantidad di hende cu ta huy di e pais rumbo pa Republica Dominicana.
Haitianonan ta huy di hamber y e inseguridad cu a bin ta azota e pais mas pober di e continente. Na Republica Dominicana, e Haitianonan ta tratando di probecha di e demanda grandi di trahador pa haci trabao pisa riba terenonan di agricultura y industria di construccion, cu e meta pa purba gana placa y yuda nan famia.
Debi na esaki, autoridadnan Dominicano a cuminza reforza patruyahe na e frontera cu Haiti. Y nan ta garando masha hopi mes cu ta drentando e pais sin ningun clase di documento.
Durante e prome siman di September so, Inmigracion a detene 661 Haitiano cu a drenta e pais na forma ilegal. Nan ta tene razzia tambe na Santo Domingo, y na provincia manera Santiago Rodriguez, Dajabón, Montecristi, Valverde, San Pedro, y na La Romana.
