Vigilancia estricto pa isolacion mester wordo mantene tur momento --- *Cantidad real di casonan ta mas halto cu cifranan oficial registra --- *Peliger pa servicionan vital y creacion di un lockdown natural
ORANJESTAD(AAN)—“Si ta necesario mester tuma medida pisa pa evita Covid-19 di sigui plama. Na nivel internacional ta keda proba cu si e malesa sigui plama, mundo ta wordo forsa di baha tur produccion na inicio di 2022.”
Esaki ta e pregunta cu DIARIO a ricibi di expertonan den tur ramo y sector cu ta sumamente preocupa cu e desaroyonan entorno di Covid-19.
E situacion cu den cooperacion cu informantenan experto DIARIO a presenta for di algun luna pasa na su lectornan, a sigui empeora y e forma cu publico rond mundo ta atende cu e pandemia den e temporada di fiesta, por percura na Januari pa un aumento enorme di e cantidad di casonan cu por spera y cu por paralisa economia local y mundial.
E efecto di Covid-19 riba disponibilidad di personalidad, a yega na un punto di hopi preocupacion.
Cada trahador cu no por presenta na trabou, ta un problema mas pa e produccion di un pais y finalmente di henter mundo.
E cantidad di personanan cu no por presenta na trabou na Aruba a subi na un forma serio y sigur tin preocupacion grandi pa e forma cu e contagio di Covid-19 por afecta henter comunidad dor di paralisa servicionan vital.
Uno di e temornan grandi rond muindo ta pa por ehempel un cantidad importante di trahador wordo contagia cu e virus na un compania di utilidad, loke por trece hasta produccion vital na peliger.
Na hopi pais e paralisis di transportacion a causa problema serio y ta sigui menasa turismo.
Tin otro problema serio cu ta wordo registra y cu ta e hecho cu peso di trabou ta aumenta pa e grupo cu mester sigui.
E perspectivanan pa apertura di 2022 ta sumamente alarmante. Falta di trahador ta sigui mishi cu produccion di articulonan vital y ta cada rato un problema mas serio pa produccion mundial.
“Un grupo demasiado grandi no ta mira e peliger di no contribui na tempo cu medidanan cu ta sumamente importante. E resultado di falta di responsabilidad ta haci, cu lockdown natural ta wordo crea,” informantenan a indica.
Un situacion hopi serio segun informantenan ta sconde den e hecho cu tin hende cu ta na haltura cu nan por a wordo infecta of cu hasta a wordo registra como caso positivo pero no ta isola nan mes of preveni cu nan por contagia otro.
Ta wordo papia di casonan di hendenan infecta cu ta sconde e berdad te na momento cu realmente nan no por mas.
Den e tempo aki nan ta infecta cantidad di persona.
Un advertencia a wordo lansa dor di informantenan cu a splica cu Omicron ta parce menos fuerte cu e otro variantenan. Pero no tin ningun seguridad cu otro variante no ta mas fuerte.
Informantenan a bisa cu mester interpreta cifranan na forma real sigur na un isla chikito.
Ta yega e momento cu no ta gobierno pero e situacion ta percura pa un lockdown cu ta wordo yama natural pasobra ta e cantidad di casonan cu ta presenta nan mes, ta afecta produccion di un empresa.
E perspectivanan pa 2022 ta sumamente preocupante. Aruba y henter mundo ta drenta 2022 cu un cargamento pisa cu por empeora a base di conducta di hende, cu ta e factor principal den e forma cu e pandemia lo continua.
