ORANJESTAD (AAN): Ta increibel pa mira con e hendenan aki di berdad no tin nada drechi pa haci.
Ta papiando akinan di esnan cu ta purba tur manera pa hende cay den nan trampanan. Pa colmo ta trata di hende cu ta pretende di comete un estafa of 'scam' pa medio di informacion basta bobo mes.
Por ehempel, por mira cu un biaha mas ta circulando riba email un cu ta bisa: "Bo paquet mester f5.58 pa ta entregá. Aha! tene cuidao pasobra esaki ta simplemente un estafa.
Por mira cu e 'scammers' aki lo a uza kisas ChatGPT pa traduci un supuesto mensahe na Papiamento, cu parce mas Papiamentu, pero cu ta resulta di ta un mensahe sin pia ni cabes. Pero mas tristo di esaki ta cu tin hende cu ta kere y ta cay den e trampa.
A pesar cu den e caso aki no ta pidiendo hopi placa pasobra nan ta papiando cu mester paga 1 florin of tin biaha 5.58 florin, corda cu semper tin un comienso. Un bes cu bo cay, nan lo sigui hacie y e ora nan lo bin pa mas.
DIARIO a trece dilanti dialuna un articulo cu algun conseho pa no cay pa informacion of noticianan falso. Ta ripiti e tips aki un biaha mas:
-Analisa e informacion: examina e contenido detayadamente.
-Separa e informacion den partinan pa establece kico por ta berdad y kico por ta falso: ta yuda evalua e veracidad di un hecho di manera independiente.
-Uza hermentnan di verificacion: esaki por inclui basenan di dato di hechonan verificabel, websitenan di verificacion, comparacion di imagennan, entre otro.
-Busca e contexto: esaki ta inclui investiga cualkier informacion adicional cu por proporciona un comprension mas completo di e situacion.
Den e caso aki di e paki, por mira cu: no ta uzando un ortografia corecto, por mira tambe cu aunke parce cu ta trata di un email di Post Aruba, corda cu tin detayenan cu por hiba bo na haya sa cu tin cosnan cu no ta cuadra, por ehempel number di telefon.
Ta importante pa comunidad ta bon informa y pa no cay den trampa di criminalnan cibernetico.
