ORANJESTAD (AAN ) – Den entrevista cu DIARIO, Herrick Henriquez, director di Asociacion di Comercio y Industria di Aruba (ATIA), a comenta cu ora e container cu productonan ta baha na Aruba, mester
paga impuesto riba e container tambe, y pesey e prijsnan ta bay keda halto.
Henriquez a menciona cu esaki ta algo cu na 2021 ATIA a trece dilanti pa wak si e por wordo cambia, pero e impuesto di BBO tur hende por a wak ora di bay supermercado, cu e prijsnan di producto ta hopi mas halto.
El a comenta cu e mes a haci calculacion di algun cos y el a ripara cu prijs ta mas halto cu e 1% cu ta wordo bisa. Esaki door cu tin schakel, y BBO cada schakel ta bira 7%.
Henriquez a menciona cu aña pasa tabata tin reunionnan pa e sector comercial unda a papia di incentivonan pa trece mas inversion den e mercado, y ATIA tin speranza ainda cu esaki lo bay door y nan por presenta e rapport aki na Gobierno.
El a menciona cu ATIA kier mira e BTW, cu ta e sistema mas facil y miho pa gobierno tambe, unda un consumidor cu gasta mas ta paga mas. Henriquez a subraya cu ATIA ta spera cu BTW no ta for di mesa, pasobra e ta algo cu lo bay yuda Aruba tambe.
