Director di ATIA Herrick Henriquez:
ORANJESTAD (AAN) -- Den entrevista cu DIARIO, señor Herrick Henriquez, director di Asociacion di Comercio & Industria di Aruba, a elabora tocante e tema di prijs, ya cu ATIA ta haya hopi keho cu Aruba ta mas caro cu otro mercadonan eyfo.
Henriquez a señala cu e consumidor ta manda den e mercado. Un comerciante no por hisa y subi su prijs manera e kier. Pero companianan manera ELMAR y WEB por hacie pasobra nos mester di nan. “Hopi biaha nos ta kere cu un comerciante ta traha pa haya porcentahenan halto; pero hopi biaha e porcentahenan ta chikito, y nan ta bende volumen, y asina nan tin cu cubri nan gastonan. Manera prijsnan ta subi nan ta purba inverti pa baha nan, pero e inversionnan no ta baha e prijs mesun cos”, Henriquez a señala.
El a sigui bisa cu mayoria di biaha, riba e prijsnan cu comerciante ta haya riba mercado liber, pa trece Aruba, no tin control riba nan. “Cosnan asina ey nos tin cu wak con pa yuda, pero gobierno por cuminza yuda cu esey. Por cuminza yuda pa wak si por baha coriente y awa. “A baha coriente y awa, un tiki, aña pasa. Pero ta algo cu nos ta den dialogo cu nan, di strategianan con esey por bay un tiki miho”, Herrick Henriquez a comenta.
Henriquez a sigui bisa cu tin un ley nobo di invoerrechten cu mester bin na vigor, y esey ta cosnan cu ATIA a dialoga cu gobierno: di con no por baha invoerrechten un poco mas. “Pasobra hopi biaha invoerrechten ta pa proteha companianan local. Awo, si no tin hopi compania local cu ta produci, pero nos ta importa tur cos, nos ta compronde, e ta un ‘money maker’ pa caha di gobierno, pero esey tin efecto directo riba bo prijs” Director di ATIA a señala.
