ORANJESTAD (AAN): Recientemente DIARIO a entrevista CEO di ATA, Ronella Croes y a puntre riba e mercado di turismo di Europa.
El a splica cu semper Europa a representa un mercado mas chikito pa Aruba, pero e hecho cu e bishitantenan primario di Europa, esta e Hulandesnan, ta keda riba nos isla pa 11 of 12 dia, ta haci esaki un mercado atractivo.
“Debi na e hecho cu e bishitantenan aki ta keda mas dia na Aruba, nan ta laga mas atras den nos economia”.
Esey ta haci Hulanda riba su mes hopi importante y nos tin e laso natural, cultural cu ta na nos fabor, segun Croes, kende a sigui bisa cu ATA ta enfoca tambe riba Inglatera, Italia y Alemania, tur pa diferente motibo.
“Recientemente nos a habri dialogo atrobe cu KLM, p wak si por incrementa e cantidad di buelo for di Hulanda pa 8 pa siman”.
E meta no ta solamente pa brinda e mercado di Hulanda mas opcion, pero tambe otro mercadonan den Europa.
Esaki segun e CEO di ATA kende a bisa tambe cu banda di esaki ta keda hopi importante e parti di otro mercadonan.
El a splica cu ATA ta trahando riba otro opcionnan, por ehempel riba un buelo nonstop for di Suiza, cu tin un perfil di bishitante cu ta cuadra perfectamente cu locual Aruba ta desea y Aruba ta brinda.
“Si nos logra esaki, esey kiermen tambe extra posibilidadnan pa e mercado di Italia y tambe di Alemania”, segun Croes, kende a indica cu ATA ta trahando riba otro mercadonan tambe.
