Derchlien Dijkhoff ta splica tocante e dos actividadnan aki:
ORANJESTAD (AAN)—Den e periodo di vacacion aki, Aruba Tourism Authority ta forma parti tambe di e Buki di Pret, den cual nan tin dos diferente actividad.
Derchlien Dijkhoff, den entrevista cu DIARIO, a bisa cu den e programa “Ban Serio” nan ta splica riba nan evento pa mucha, hunto cu Buki di Pret. Nos tin e buki pret cu Scavenger hunt den dje. Bo por bay riba nos website, Ban serio Aruba.com of nos facebook page, busca tur informacion. Nos tin 23 pregunta e aña aki.
Aña pasa tabata un tiki menos y nos a haya e feedback masha great di mayornan, cu a puntra nos si por tin preguntanan pa nan tambe, of si nos por haci algo pa adulto. Loke nos a haci ta combina esaki caminda cu bo mester por tin un mayor cu ta core auto y cu tambe tin telefon, laga e mayornan reta nan y pone pregunta un tiki mas dificil pa nan, pa nan tambe por splica nan yiunan kico e pregunta ta. E aña aki nos ta hacie un tiki mas familiar, pa inclui tur persona cu a den e grupo”, Dijkhoff a relata.
El a agrega cu ta masha leuk pa ricibi e feedback y di momento cu ATA a lans’e nan a ricibi comentario y mensahenan di gruponan cu tin dos aña ta join esaki y ta cla pa e aña aki tambe participa.
Bishita abordo di Carnival Cruise:
Derchlien a splica cu e mayornan por registra nan yiunan pa nan por bay riba e Carnival Cruise. Kiermen, e muchanan ta bay tin un dia cu nan por bay conoce crusero, wak kico nan haci y nan ta haya full un tour di e barco. “Cupo ta limita y mi no ta sigur si e ta full yen, pero mi sa si cu siman pasa a habri e cupo pa registra pa esaki”, Dijkhoff a relata.
Esaki ta e dos actividadnan cu ATA tin pa mucha, durante e periodo di vacacion grandi aki, cu ta ocupa cu algo recreativo pero tambe educativo, e dama a acentua.
“ Por ta cu tin di e muchanan aki cu no a yega di bay riba un barco ainda, of nan no conoce e barco, anto ta duna nan e esencia di kico e ta como parti di turismo, kico un turista ta haci riba e barco, y kico e ta haci tambe ora e tin riba nos Isla y con e ta conoce nos isla den un corto periodo, tin biaha 4 ora, tin biaha 8 ora. Mester duna nan mas informacion, kico ta encera eigenlijk, un barco crusero, y tambe e turistanan cu ta bin abordo di barco”, Derchlien Dijkhoff a comenta.
