ORANJESTAD (AAN): Awor na Aruba ta saliendo na claridad, cu no ta djis prijs di webo, prijs di lechuga,
y prijs di kerstboom ta birando impagable. Desde fin di October caba, esnan cu ta busca nan cheiba (‘weed’) sea recreacional of pa haya alivio di dolor pa nan malesanan cronico, a nota cu esaki tambe a subi di prijs.
Un que otro tin di haber cu na Aruba tambe awor tin scarcedad di marihuana, y esey ta hisando prijs di loke tin. Hopi usador di e droga aki ta costumbra di cumpra paki di 15 Florin, paki di 25 Florin, of paki di 50 Florin. Cumpradornan ta riparando cu e cantidad di gram cu nan ta haya den cada sakito transparente di plastico ta birando menos.
Un fuente a indica cu ta hopi hende na Aruba ta kehando riba esaki. Y nan a haya sa, cu e “culpa” riba tur esaki ta wordo tira riba recien casonan unda riba lama, autoridad ta logra pone man riba cargamento di droga prome cu esaki yega tera. Siman pasa mes, tanto Wardacosta hunto cu Polis a gara un boto cu tabata yegando Aruba cu varios persona indocumenta abordo, hunto cu varios baki di gasolin, y tambe bulto di marihuana.
Na fin di October tambe na peninsula di Paraguana na Venezuela, a logra di intercepta hopi marihuana scondi den mondi, bao tera, y den casnan.
E potret aki saca den fin di siman ta mustra un cargamento di 750 kilo di marihuana cu a wordo confisca na diferente municipio na departamento di La Guajira, cu ta e parti mas noordoost di Colombia (djis algun cien kilometer pabao di Aruba).
Polis di Colombia a indica cu e 750 kilo di droga aki tabata destina pa subi lama pa sea bay Caribe, Centro America, of Venezuela. Den e razzia aki, nan a detene 10 persona cu tabata na e lugarnan unda e droga aki tabata scondi. A tene razzia na Riohacha, Maicao, Barrancas, y San Juan del Cesar. A confisca un revolver, 9 smartphone, y demas documentonan cu ta mustra claramente pa kende e droganan aki tabata destina pe.
Pues mas mal noticia pa e usadornan na Aruba. E potret aki pa cortesia Policia Nacional de Colombia.
