Nilaine Koolman di DAS ta splica pakico bijstand tambe ta baha
*Dia 25 di augustus DAS ta cuminsa tuma ricibi formulario pa bijstand
ORANJESTAD (AAN): Nilaine Koolman ta traha den e seccion di sosten financiero di Departamento di Asuntonan Social y el a splica cu ora cu scol termina, e parti di e ‘kindertoelage’ tambe ta termina. E ta mara na esey, el a indica.
Manera cu entrega e parti di scol, esta e declaracion di prueba cu e hoben ta bayendo scol, e ta activa y tin e derecho di haya e placa ey. Pero manera cu scol termina tambe e derecho aki ta termina eynan. Locual esey ta trece ta cu e clientenan cu ta haya bijstand ta bay cuminsa cobra menos.
El a sigui bisa cu tin hende cu ta cuestiona pakico y ta cuminsa yama DAS, pero esaki ta netamente mara na e aña escolar.
E motibo pakico ta para ‘kindertoelage’ ta pasobra asina ta evita cu ta bay cobra di mas ya cu lo por bay cobr’e bek. Na di dos luga ta pasobra e cliente of nan famia no ta bay scol mas, nan ta bay traha y nan situacion ta cambia, el a splica.
Formularionan pa haya bijstand
El a agrega cu loke DAS ta haci ta cu manera cu scol termina ta prepara nan schedule y ta adapta e formulario pa e aña escolar nobo cu ta bay tin. Ta manda esaki por medio di email na e scolnan manera cu scol habri.
E siman aki, scol a habri y esaki ta locual ta bay sosode.
Ora cu scol ta ricibi e formularionan aki, nan clientenan cu ta activo riba bijstand y esunnan nobo cu a entrega e peticion caba, por bay pidi scol e formulario y entrega esaki totalmente yena na DAS. Esaki ta mara na un schedule y na un proceso.
Segun schedule, dia 25 di augustus DAS ta cuminsa tuma esaki te cu dia 28 di augustus. Pero e aña aki tin cambionan. Antes, e pago tabata sosode na Postkantoor, via carnet den forma alfabetico. Aworaki gran parti di e clientenan ya caba ta cobrando via di nan cuenta di banco.
E cambio awor ta encera cu ta bay parti number. Pa dia 25 te cu dia 28 cu mester entrega e formulario no ta bay ta den orden alfabetico mas. Ta bay parti 120 number pa dia y esey ta nifica cu ta responsabilidad di e cliente pa pidi scol e formulario na tempo pa e ora pa dia 25 por entrega esaki, Koolman a remarca.
DAS ta encurasha pa entrega e formulario personalmente.
