Pader Jose Nava
ORANJESTAD (AAN)—Diahuebs di e siman aki, Iglesia Catolico a celebra e Fiesta di Ascencion di Jesus na cielo cu ta e ultimo fiesta cu cual ta cera e tempo di Pasco di Resureccion. Asina Pader Jose Nava a bisa den conferencia di prensa.
El a expresa cu esaki ta un tempo cu ta hala atencion e elemento di Bida. Nos Dios ta un Dios di bida.
Un Dios cu a resucita y ta comparti Su Bida cu nos. P’esey nos FE Catolico semper ta busca crea lugarnan unda e bida y e cultura di bida por sigui crece y desaroya.
“Particularmente, den e contexto di e Siman Catolico y den e contexto di e Luna aki, cu nos ta celebra Pentecost, nos tin e concurso di rosario traha cu material di reciclahe. Ta un elemento importante e Luna di nos Mama Maria, Dia di Mama den nos sociedad, y ta hopi importante pa nos por yuda nos muchanan desaroya devocion na nos Mama Maria, y na mesun tempo pa crea cultura di reciclahe. Den nos tempo aki, ta hopi importante pa nos muchanan por crea un cultura di reciclahe, pa nos por cuida nos planeta. Cuida e cas cu ta di cada un di nos, y cada un di nos ta responsable pa su cuidao y pa proteha nos cas”, Pader Jose Nava a indica.
