Minister Ursell Arends ta indica:
ORANJESTAD (AAN) – E unidadnan di Arubus den oranan piek ta core yen, pero den otro oranan ta core bashi, y esaki ta un di e aspectonan cu ta bay haci na dje.
Den entrevista cu Minister Ursell Arends, el a bisa cu eynan tambe lo bin ahustacion, y pa loke ta trata Arubus mes su fleta mester wordo renoba, unda e lo bira mas eficiente.
“Nos ta mirando den direccion di busnan electrico y busnan cu ta core cu hidrogeno p’asina wak cual ta e miho cu mester inverti den dje”, e mandatario a bisa.
Pero pa loke ta trata e cantidad di vehiculonan Arends ta kere cu si transporte publico ta confiabel, cu e usuarionan por depende riba e orario cu busnan ta yega, y nan por yega nan trabao of scol, na su debido tempo, e hendenan lo deposita nan confianza den dje.
“P’esey mes e introduccion di aplicacionnan por mustra ki ora Arubus ta yega p’asina tambe e ciudadanonan ta na haltura di e servicio, y ki ora nan por yega unda nan mester yega nan destino. Esey ta cosnan cu nos ta trahando riba nan, atravez di tecnologia por haci cambio cu transporte publico bira confiabel y e ciudadanonan por depende riba esaki”, Minister Arends a reitera.
E dignatario a sigui bisa cu PWC a haci un doorlichting di Arubus, y tin un total di 11 linea cu Arubus ta core, y solamente dos di nan ta financieramente rendabel. E otro rutanan mester wak con pa adapta nan pa conecta e ciudadano na un forma miho, cu nan tambe por bira financieramente rendabel. “Of mester bay den otro tipo y size di bus p’ asina aki reduci e gastonan cu nan genera y cu e rutanan aki tambe por bira financieramente productivo. Esaki ta datonan cu den pasado nos no tabata tin, awor nos tin esakinan y esey ta guia nos pa tuma e decisionnan corecto”, Minister Ursell Arends a acentua.
