Usuarionan vast y turista ta mustra esaki:
*Ta bon cu e chauffeurnan ta amabel y tin pasenshi!
ORANJESTAD (AAN) -- Manera tur persona na Aruba por mira, Aruba ta ricibiendo un cantidad enorme di turistanan desde varios siman caba, debi na e cruseronan grandi cu ta bishitando nos pais cada siman.
Obviamente, un porcentahe grandi di nan ta prefera bay beach, gosa di nos playanan bunita di santo blanco y nos lama cu ta hopi gusta pa su diferente tono entre blauw scur, cla y casi berde.
Pero e turistanan aki no ta bin pa pasa algun ora na Aruba na un costo halto, por ehemplo paga taxi pa bay beach, sino cu nan ta yega na e terminal di Arubus cu ta asina cerca di e terminal di crusero, y cu ta resulta nan hopi mas barata cu busca taxi.
Mirando esaki, Arubus mester ta mas diligente y eficiente. Y no ta trata di e servicio riba su mes, pasobra si tin trahadornan cu ta colma di pasenshi y bon manera ta esnan di Arubus, cu ta wordo admira tambe pasobra nan ta, practicamente, comunica den e idiomanan principal manera Ingles, Spaño y Hulandes cu e turistanan.
Pero e maneho di Arubus ta locual ta laga di desea, pasobra na prome lugar, e turistanan cu ta warda bus pa Palm Beach, Arashi, etc, tin cu warda hopi bao e higra di solo y na dado momento nan ta desespera y ta puntra aki aya, ki ora e bus ta bin, y cualkier ruta cu bin nan tur ta core pa su bus, cu ta bay pa otro caminda. Ora e bus di hotel ta yega nan no ta para den rij sino cu ta amontona, y meymey tin nos hendenan local cu ta bayendo trabao merdia, y tin biaha e bus ta yena asina lihe cu kizas nan a yega cu suficiente tempo, pero no a haya oportunidad di subi bus y tin cu keda warda e siguiente, cu consecuencia cu nan ta yega trabao laat.
Si Arubus sa perfectamente cu e situacion aki ta presentando practicamente tur dia, cu hopi turista ta bira impaciente y e pasaheronan local (vast) ta bira disgusta y preocupa, di con den e momentonan peak no ta prepara dos bus mesora. Tin dos liña pa e busnan cu ta core e ruta di hotel. Si tin dos bus na mes momento, tanto turistanan como localnan ta haya chens di subi y sinta trankil, incluso si resta pasahero cu ta bay para. Pero no yena un bus, lague bay completamente yen, y laga hende wardando e siguiente cu ta yegando entre mey ora pa 40 minuut despues! Ora e bus ta asina yen, ta un problema pa baha di e bus, por ehemplo den e stop bus dilanti ex-Bushiri. Bo tin cu bula riba maletin, saconan, y kico cu e turistanan cu ta di pia, tin cu pone riba e vloer. E pasahero local ta baha di e bus tur disgusta.
Si Arubus ta planifica miho, nada di esaki ta sosode. Esaki ta comentarionan cu mas di un usuario vast di Arubus ta haci, y hasta turistanan ta comenta.
