Prome Minister Evelyn Wever-Croes: - ORANJESTAD (AAN): Aruba y Hulanda a yega na acuerdo riba e contenido di na e Ley di Reino di Supervision Financiero pa Aruba (Raft), y pa encamina e proceso legal pa yega na e ley aki.
Ultimo lunanan, na mes momento cu e conversacionnan cu demas pais den Reino tabata tuma luga encuanto Ley di Reino COHO, a tuma luga varios ronda di conversacion entre Aruba y Hulanda encuanto e consehonan di Conseho di Estado (Raad van State) y e Conseho Consultativo di Aruba (Raad van Advies).
Na final a yega na un consenso encuanto e contenido y alcance di e ley aki, na satisfaccion di ambos partido.
Minister-president di Aruba Wever-Croes:
“Aruba y Hulanda a yega na un acuerdo riba e caminda pa cana pa finansa publico sostenibel. Esaki danki na e esfuerso enorme di expertonan den ambos pais. E tarea cu tin nos dilanti ta uno serio. Determina y cu un vision coherente nos lo logra recuperacion di nos pais. Nos lo transforma nos retonan den oportunidadnan, esaki ta Aruba”.
Secretario di Estado Knops:
“Finansas publico solido ta sumamente importante pa Aruba. Cu e acuerdo encuanto di e contenido di e proyecto di ley di e Rijkswet Aruba financieel toezicht (Ley di Reino Supervision Financiero Aruba) un paso importante a wordo poni pa entre otro reduci e debenan di Aruba. Mi ta confia cu Aruba realmente logra e obhetivonan aki”.
E acuerdo
E propuesta di ley tin como meta e continuacion di e supervision financiero institui na 2015. E motibo di esaki ta e hecho cu, contrario na 2015, Aruba mientras tanto a presta al rededor di 900 miyon florin for di Hulanda, na 0% di interes, y Hulanda kier pa continua cu e supervision financiero, en todo caso tanten cu e debe aki no wordo paga.
Aparte di e continuacion di e supervision, a adapta e normanan pa por hiba esaki na e realidad nobo en bista di e impacto economico y financiero di e crisis di Covid, y suplementa, cu entre otro e introduccion di normanan pa gastonan di personal y un maximo na debe. Tambe a determina e condicionnan bao di cual despues di tempo e supervision lo termina, y con e financiamento di inversionnan di Pais Aruba por wordo haci na condicionnan faborable.
E meta ta pa e quota di debe, cu ta wordo estima di bira aproximadamente 120 % di e PIB pa fin di e aña aki, wordo reduci pa 50% den aña 2040. Esaki lo wordo logra cu surplusnan continuo riba presupuesto cuminsando for di aña 2023. Debi na e Covid-crisis Aruba no mester realisa un surplus riba presupuesto pa aña 2022.
Ademas a stipula cu mester yega na e norma pa gasto di personal di 10% di PIB entrante aña 2027
E normanan nobo aki ta wordo considera normanan realisitico pa logra finansa publico sostenible pa Aruba.
Aproba
E concepto di ley riba cual Aruba y Hulanda a yega na acuerdo a wordo aproba dia 3 di september den Conseho di Minister di Reino.
Despues di acuerdo di Conseho di Minister di Reino e propuesta di ley lo wordo entrega na Parlamento di Aruba y Hulanda.
Na e momento ey e propuesta lo bira publico. Mientras tanto Parlamento di Aruba dia 12 di augustus ultimo ya a wordo informa di e lineanan grandi di e contenido di e ley aki.
