Derchlien Dijkhoff di ATA:
ORANJESTAD (AAN): Cuida nos medio ambiente y nos beachnan na Aruba ta un responsabilidad di cada ciudadano cu ta biba na Aruba. Specialmente durante temporada di campamento cu ta den porta, e responsabilidad aki di preserva e beyeza natural pa nos futuro generacionnan disfruta tambe, ta bira mas importante y necesario. Cada ciudadano mester actua cu consciencia, respeta naturalesa y laga nos beachnan limpi.
Señora Derchlien Dijkhoff di Aruba Tourism Authority (ATA), a indica den un entrevista cu DIARIO cu e campaña ‘Ban Serio’ lo wordo lansa un biaha mas durante e siman di campamento. E iniciativa ta enfoca riba conscientisacion di medio ambiente, pero tambe riba cuido personal y di nos muchanan, enfatisando cu cada individuo ta haci un impacto directo den comunidad.
Pa hopi aña, tradicionalmente, ciudadanonan ta uza beachnan y otro luganan publico pa campa durante e temporada di Pasco Grandi. Esaki ta un momento di union y pa comparti cu otro. Sinembargo, señora Dijkhoff a subraya cu ta esencial pa tene cuenta tambe cu e turistanan cu ta disfrutando di nos beachnan durante e periodo aki.
E ta haci un apelacion fuerte na tur ciudadano cu ta bay campa pa sigui y mantene e reglanan di campamento estableci pa cuido di espacio publico. Laga cada area limpi manera a haya esaki y hiba bek tur loke a hiba na e sitio di campamento, incluyendo sushi. Ta fundamental tambe pa preveni cu saconan di plastic no bula bay den lama, pa asina proteha nos bida marino.
