“Aruba tin su propio historia di sclavitud cu merece di ser conta y preserva”

“Aruba tin su propio historia di sclavitud cu merece di ser conta y preserva”

Parlamentario Xiomara Maduro:

ORANJESTAD (AAN): Recientemente Parlamentario y ex Minister di Cultura Xiomara Maduro a ricibi cu hopi aprecio e tercer edicion di “Slaven Zonder Plantage” di historiado Luc Alofs, un obra importante cu ta documenta e historia particular di sclavitud na Aruba.

E tercer edicion ta bin den un periodo di mayor conscientisacion tocante e pasado di sclavitud, despues di e disculpa oficial di Estado Hulandes pa su papel den e historia aki.

Maduro ta enfatisa cu Aruba tin su propio historia di sclavitud, diferente di e realidad di plantagenan grandi den otro parti di Caribe, y cu e historia aki merece di ser conta y preserva.

Durante su periodo como Minister di Cultura, Maduro a pone enfasis riba conscientisacion di pueblo door di comparti informacion historico, videonan informativo y organisa dialogo tocante nos pasado di sclavitud.

“Nos historia no por keda den silencio. Nos tin e responsabilidad di conta nos propio historia, honra nos antepasadonan y transmiti nos herencia cultural na generacionnan futuro.”

Maduro ta expresa su gratitud na sr. Luc Alofs y tur e investigadornan cu ta contribui na preservacion di nos patrimonio historico y cultural. “Pa sa ken nos ta, nos mester conoce di unda nos ta bin.”