Minister Dangui Oduber
- Carni di baca di Colombia lo ta mas economico
ORANJESTAD (AAN): Den fin di siman, Minister di Salud Publico, Dangui Oduber a duna update, splicando cu instancianan ta den e fase final di evaluacion pa por reanuda importacion di carni di baca for di Colombia.
Pa por a yega na e fase aki a sigui un proceso amplio y responsabel pa por garantisa e seguridad sanitario di e carni. Actualmente por importa solamente carni for di abattoirnan di Merca of paisnan miembro di Union Europeo, of for di abattoirnan cu ta autorisa pa exporta pa Merca of Union Europeo.
Den cuadro di e evaluacion pa por reanuda importacion di carni di baca for di Colombia, na luna di Mei aña pasa representantenan di Ministerio di Turismo y Salud Publico a forma parti di e Mision Comercial cu a bishita Colombia, cual a ser organiza pa Ministerio di Asuntonan Economico, Comunicacion y Desaroyo Sostenibel, conhuntamente cu Camara di Comercio di Aruba, den cooperacion cu Embahada di Reino y Holland House na Bogota.
Durante e Mision Comercial a tene reunionan cu entre otro e instancianan concerni, esta e Instituto Nacional de Vigilancia y Alimentos (INVIMA), y e Instituto Colombiano Agropecuario (ICA). Tambe a haya varios presentacion di representantenan di e sector agropecuario y a bishita entre otro un laboratorio moderno cu ta haci pruebanan pa garantisa seguridad y calidad di carni.
Durante dicho bishita por a constata na prome bista cu Colombia den transcurso di añanan a construi un sistema di supervision di seguridad y calidad di carni pa consumo humano di alto nivel, y a base di esey ta exporta pa como 84 pais rond mundo, incluyendo nos hermana isla Curaçao. Tambe a constata cu varios compania cu tin abattoir y ta exporta desde Colombia, ta companian multinacional cu standardnan halto di calidad cu ya ta exporta varios otro producto alimenticio pa Aruba y/of ta exporta carni pa Aruba for di nan plantanan estableci den otro paisnan.
Den cuadro di e evaluacion pa por reanuda importacion di carni di baca for di Colombia, recientemente representantenan di Ministerio di Turismo y Salud Publico, y di Departamento Veterinario, a forma parti como observador di un auditoria di e Organizacion Ehecutivo di Asuntonan Veterinario di Curaçao, di abatiornan na Colombia. Den cuadro di e auditoria aki e Organizacion a worde asisti pa un experto di e “Nederlandse Voedsel en Warenautoriteit”.
A base di e bishita ey por a confirma hunto cu expertonan for di Reino Hulandes e calidad di e sistema di supervision di Colombia pa cu e seguridad y calidad di carni pa consumo humano. Ademas tin un otro desaroyo relevante: Colombia a avansa medio juli 2024 di “Step 3B” pa “Step 4” di e evaluacion di USDA (cu ta consisti di 6 “Steps”), cual ta demostra cu Colombia ta avansando den su esfuersonan continuo pa den un futuro lo por bay exporta carni pa e mercado Mericano.
Awo Ministerio di Turismo y Salud Publico a yega na e fase final, cual ta stipula e terminonan di exportacion a base di un acuerdo bilateral (“Protocol Sanitario”) den cual ta acorda e exigencianan pa por garantisa e proceso di exportacion conforme standardnan halto di calidad y seguridad. Ministerio di Turismo y Salud Publico ta den e fase final di e proceso aki, y ta den dialogo cu tur e instancianan concerni pa finalisa y logra e cambio aki.
Pues Ministerio di Salud Publico, den cooperacion cu Ministerio di Asuntonan Economico, Comunicacion y Desaroyo Sostenibel, y den consulta cu varios instancia Gubernamental den Reino Hulandes y di Colombia, ta sumamente avansa riba tema di importacion di carni di baca for di Colombia, y ta premira cu, despues di como 20 aña, pronto lo por reanuda esaki.
E iniciativa pa importa carni di baca for di Colombia tabata pa largo tempo un e deseo di Minister Dangui Oduber y Gabinete Wever-Croes, pa asina e mercado lo por ofrece carni na un miho prijs na e comunidad di Aruba. Pa medio di e cambio den e maneho di importacion, pues ta bay logra ofrece un opcion mas di unda carni di baca lo por worde importa, asina creando variedad y yuda na baha e costo di bida pa varios hogar aki na Aruba.
