Hendrik Tevreden, lider di Fraccion di MEP:
*Un supletorio historico cu un surplus di 1.3% di GDP
ORANJESTAD (AAN): Parlamentario Hendrik Tevreden, Lider di Fraccion di MEP, a presenta durante su disertacion dialuna den sala di Parlamento un analisis riba e Presupuesto Supletorio cu ta destaca un sorprendente surplus di 1.9% di e Gross Domestic Product (GDP).
Manera ta conoci caba, tratamento di e presupuesto supletorio 2023 a wordo trata ayera den Parlamento di Aruba y lo ta un siman intensivo pasobra lo sigi di biaha cu presupuesto 2024 henter e siman.
Tevreden a remarca cu, contrario na añanan anterior y na e gestion di otro partido den oposicion, Aruba ta conoce awe un cambio positivo cu ta indica cu Aruba tin un gobierno responsabel den maneho di finansas publico.
El a subraya cu, si compara cu e presupuestonan di gabinetenan anterior, awo na 2023 ta prome bes den e decada aki cu tin un surplus cu ta refleha un aumento significativo den e direccion corecto.
E parlamentario a destaca cu segun e protocol di 2018, ora tin un surplus riba 1%, 50% di esaki tin di wordo inverti pa extra inversion y e otro 50% tin di bai pa paga debe di Aruba prome cu Covid.
Tevreden a identifica algun di e inversionnan extra, incluyendo un asignacion di 4.8 miyon florin pa e Proyecto Oscar di Brandweer, algo cu a keda neglisha y cu desde 2018 a urgi parlamento pa corda riba e departamento aki. Y awe esaki a wordo realisa pa gobierno.
Tevreden tambe a puntra Minister di Enseñansa sr. Endy Croes pa elabora riba e Proyecto di e segundo Fase di HAVO/VWO cual ta un suma di 2.6 miyon florin y e otro inversionnan den Juliana School cu ta un suma di 6.8 miyon. E parlamentario a remarca cu e inversionnan den educacion ta critico y necesario pa e desaroyo di nos hobennan y nan futuro, y cu esaki ta mustra e compromiso serio di MEP pa mehora e infrastructura educativo di Aruba.
Dentro di e lista di inversionnan, Tevreden a menciona e renovacion di e edificio di Parlamento, cu a keda prolonga durante varios aña y cu awor lo bira un 'state-of-the-art'. Ta increibel pa pensa cu e edificio di parlamento no tin espacio pa parkeer pa e representantenan di pueblo, tampoco no tin lift pa esnan cu limitacion y e hala parti patras no ta un bista pa e organo mas halto di nos pais. "Pesey nos ta satisfecho cu lo bini un cambio y mehoracion den tur esakinan pa e futuro generacion di representantenan y e cara di nos pais".
AVANCE DEN CRECEMENTO ECONOMICO
Hendrik Tevreden a indica cu e crecemento economico actual a surpasa e nivelnan di 2019 cual por cierto tabata e mihor aña economicamente di Aruba, y ya caba nos a surpasa esaki y saliendo di un pandemia.
Aruba ta experenciando un crecemento economico positivo segun informacion di Departamento di Asuntonan Economico, Banco Central (Economic OUTLOOK), IMF (Staff Report 2023), y CAft (advies Cft 202300111 pag. 1), e cifra di crecemento pronostica ta rond di un 10.1% cual ta algo impresionante.
E parlamentario a puntra pueblo pa reflexiona riba esaki pero tambe riba e punto cu partidonan di oposicion, manera AVP, MAS, y ACCION, nan informacion no ta concorda cu e instancianan menciona pero semper tin un informacion no funda.
PRESUPUESTO CU DISCIPLINA Y SOSTEN NA E CLASE MEDIO
Pa loke ta e punto di 'meevallers' y realisacion di BBO na Frontera, kier pa e fondonan aki yega den futuro mas cerca di e clase medio. Ta urgente pa fortifica e grupo aki, pasobra e pandemia a azota nan basta fuerte.
E lider di Fraccion di MEP a remarca riba e disciplina di presupuesto di Gabinete Wever Croes II, mencionando cu e gobierno a brinda compensacionnan necesario durante e cambionan fiscal entre otro riba 'winstbelasting', pa comerciantenan, empresanan, multinacional y negoshinan chikito. Sinembargo, e parlamentario a haci un yamado pa gobierno concentra cu esfuerzonan sostenibel y riguroso pa fortifica e clase medio y clase social den nos comunidad.
MIRA PA FUTURO
Tevreden a conclui cu un pregunta importante: Kico ta e posibilidad pa baha o kita Loonbelasting den futuro? Esaki lo ta un aumento directo pa e ciudadano su cartera y un avance directo den su finansas familiar. Ariba e punto aki lo bini bek pa mira con Gobierno ta mira e pensamento presenta y scucha nan contesta riba esaki.
E Presupuesto Supletorio 2023 ta wordo considera como un paso positivo pa Aruba su recuperacion. MEP ta enfoca riba sostenibilidad y bienestar di e comunidad.
Tevreden a finaliza destacando e disciplina den maneho di presupuesto di Gabinete Wever Croes II, y a puntra pueblo pa reflexiona riba e logronan y seriedad di e gobierno actual.
