CDC no ta recomenda viaha pa Aruba - ORANJESTAD (AAN): Locual a wordo premira a bira realidad.
Aruba a wordo poni den e lista di paisnan di risico hopi halto (Nivel 4, den cora) y CDC di Merca ta recomenda tur viahero evita viaha pa Aruba.
Den caso cu un persona kier viaha pa Aruba e mester ta completamente vacuna. CDC ta bisa cu pa motibo di e actual situacion di Covid-19 na Aruba, toch esnan vacuna lo por ta den risico di wordo infecta cu Covid-19.
E conseho di viahe aki sigur ta un golpi pa Aruba, principalmente pa turismo.
Esaki ta nifica cu e turistanan lo pensa dos biaha ora di dicidi haci nan viahe pa Aruba un realidad. Y si nan a book caba, e advies aki lo por nifica den mas cancelacionnan manera a bin ta sosodiendo caba.
E unico manera pa bay bek na un nivel di menos risico lo ta si mas hende vacuna ya cu di e forma aki e cantidad di casonan di Covid-19 lo bira menos.
Cifranan ta mustra cu esnan interna na Hospital te cu dialuna, 82 % no tin ningun vacuna y esaki ta un indicacion tambe cu esnan cu ta contagiando, den un mayoria, ta esnan cu no a haya ningun dosis di e vacuna contra Covid-19.
