ORANJESTAD (AAN): E siman aki, CEO di Aruba Tourism Authority (A.T.A.) señora Ronella Croes a entrega e “Destination Resilience Award” cu Aruba a ricibi for di Caribbean Hotel and Tourism Association (CHTA) na Minister di Turismo y Salud Publico sr. Dangui Oduber.
Esaki ta un reconocimento cu Aruba a haya pa tur e trabaonan desplega durante e pandemia. Dia 3 di october 2022 ultimo ta prome biaha den historia cu un premio asina a keda otorga.
E premio a worde entrega durante un ceremonia di entrega di premio na San Juan, Puerto Rico como parti di e di 40 aniversario di CHTA su Caribbean Travel Marketplace.
Aruba a keda reconoci pa e maneho di e destino y e programanan di recuperacion cu a worde implementa pa por a ricibi bishitantenan back despues di ceramento di frontera. Aruba a haya e reconocimiento aki pa e excelente manera con Aruba a tuma e mihor decisionan y accionan durante e pandemia cu awe a resulta den un di e mihor recuperacion na mundo.
E documentacion compila ta mas cu claro ilustra hopi otro logro entre otro digitalisacion di e plataforma di imigracion, introduccion di e Aruba Visitors Insurance. Un trabao duro y exitoso di parti di Aruba, cual A.T.A. tin e honor di por a accepta. Esaki ta un merito pa ambos sector publico y sector priva cu ta traha di cerca pa cu bienestar di nos turismo, incluyendo e ekipo completo di A.T.A.
Minister Oduber sigur ta ricibi e plakkaat aki cu un gran honor, e lo sirbi como motivacion pa sigui traha duro na bienestar di tur hende cu ta biba riba nos pida baranca.
Aruba henter por ta orguyoso di e reconocimiento aki cu ta duna reconocimiento na tur e trabaonan y esfuerzonan di Ministerio di Turismo. Minister Dangui Oduber ta agradecido pa esaki como mandatario.
