Minister Geoffrey Wever:
ORANJESTAD (AAN) – Minister Geoffrey Wever, titular di Asuntonan Economico, Comunicacion y Desaroyo Sostenible, den entrevista cu DIARIO a duna di conoce, cu pa casualidad e tabata tin un reunion cu Aruba Fair Trade Authority, cu no ta pa motibo di e conferencia di prensa di Comerciantenan Uni Aruba (C.U.A), sino cu nan ta reuni periodicamente y den e reunion aki a toca diferente tema, entre otro e funcionamento di di AFTA.
Entre e temanan cu a trata ta e ampliacion di nan cuadro legal pa inclui e proteccion di e consumidor, cu ta kedando den su fase final, ya cu e ley ta casi cla.
“Nos mester corda cu Aruba Fair Trade Authority ta un entidad unda nos ta yama ZBO. E ta un entidad huridico cu ta riba distancia di gobierno. Ami como Minister di Economia ta responsible pa AFTA, pero mi no tin e autoridad pa bisa kico e tin cu haci of kico no pa haci. Pues, nan mes por investiga tur posicion, por ehemplo di cartel, abusonan di mercado, nan p or bisa tal empresa of grupo di empresa ta violando e ley di competencia husto, na Aruba y nan por dicidi di investiga esey y actua tambe segun e instrumentonan legal cu nan tin”, Minister Geoffrey Wever a splica.
“Como ehemplo, ban suppose cu ta un grupo di contratista cu ta mantene prijs sumamente alto, loke no mag, ora AFTA por traha un bezwaar bisando cu nan ta constata esaki, cu ta viola e articulo tal, di e ley di competencia husto, y cu nan tin tanto dia pa cambie. Si nan no cambie nan por impone boet”, e mandatario a señala.
El a agrega cu ora impone boet e comerciante of instancia cu a haya e boet por bay Corte pa bringa su caso. Pues, e ta un sistema huridico cu ta completamente distancia di e Minister di Economia.
“Pues, den e caso aki e Minister di Economia den e caso aki, su poder ta limita; naturalmente nos a empodera nan, a percura pa e cuadro legal tey, a institui nan, y nos ta percura pa tin e fondonan pa traha, y tin cierto autoridad cu e minister tin cu eherce, por ehemplo aproba e cuenta anual, begroting, nombra e bestuur, etc., pero nan forma di opera a completamente independiente” Minister Geoffrey Wever a señala.
