E topico mas importante na Aruba na e momentonan aki ta Ukraine --- *Tin Arubiano como Hulandes mobilisa den e tropanan Europeo? --- *E realidad di Reino Hulandes cu Hulanda como parti Union Europeo
ORANJESTAD (AAN)- Durante e siman cu a termina, e prioridad di mas grandi pa DIARIO tabata, sigui tur desaroyo na y entorno Ukraine.
E falta di interes pa e topico aki den discusionnan local, ta loke mas a exigi atencion di DIARIO, cu mester a conclui cu pa un grupo demasiado grandi, Ukraine ta leu for di Aruba.
E loke ta pasa na Ukraine actualmente, no solamente ta menasa paz mundial na forma sumamente serio, manera hasta Presidente di Merca, Joe Biden, y Gobierno di Hulanda mes ta confirma.
Den e conflicto na Ukraine, Hulanda ta directamente envolvi como parti di Union Europeo, cu a menasa Rusia cu mas medida cu Europa ya tin contra Rusia, si un invasion di Ukraina dor di Rusia bira realidad.
Di e forma aki, Aruba ta den un situacion cu hopi bez na Aruba, un grupo grandi no kier of por realisa, debi na e hecho cu e informacion al respecto no ta wordo duna manera mester ta.
Aruba no ta un pais independiente. Aruba ta un parti di Reino Hulandes, E Arubiano tin nacionalidad Hulandes. E ehercito y marina di Reino, ta Hulandes y encarga cu defensa di Aruba tambe.
Na mes momento Hulanda ta parti di Union Europeo, uni na Europa pa medio di entre otro e Euro, cu ta e moneda cu ta wordo uza pa duna asistencia financiero na Aruba.
Na e momento aki pues Aruba ta parti di Reino Hulandes, cu pa medio di Hulanda ta den un conflicto cu Rusia.
Ayera Hulanda a pidi tur Hulandes na Ukraine pa bandona Ukraine, no biaha pa Ukraine y sigur no keda na e partinan mas peligroso.
A wordo mustra cu den e situacion actual, Hulandesnan no solamente por haya asistencia na e Embahada Hulandes, pero tambe na Liev.
Gobierno Hulandes a mustra cu awor Hulandesnan mester bandona e zonanan “cayente” den e conflicto, cu por resulta den sancionnan Europeo contra Rusia, mientras cu lo no tin evacuacion si Rusia ataca.
Kico esaki a nifica? Kende ta Hulandes na Rusia? Kende Reino Hulandes ta obliga di duna asistencia na Rusia?
No solamente Hulandesnan cu a biba actualmente na Hulanda pero tur persona di nacionalidad Hulandes.
Esaki ta hiba nos na un punto mas importante.
Kende ta forma parti di tur loke por considera militar na Hulanda? Personanan cu nacionalidad Hulandes.
Tin Arubiano den gruponan militar di Hulanda? Tin compania Arubano na Rusia? Tin interes Arubano na Rusia?
Informacionnan di DIARIO ta bisa cu si.
Informacionnan clave ta indica, cu Aruba mester haya mas informacion di e situacion cu ta desaroya na Rusia, mas ainda teniendo cuenta cu e posicion di Aruba cerca di Venezuela, Cuba y otro satelitenan Ruso.
Varios dirigente mundial a papia di e hecho cu nan ta actua cu cautela enfrente e posibilidad di un guera mundial.
DIARIO no ta yena Aruba cu susto. Pero si ta deber di DIARIO di informa Aruba debidamente di un situacion cu mester di mas splicacion pa Aruba y pa Arubianonan, cu tin un pasaporte Hulandes, nacionalidad Hulandes pasobra nan ta parti di un Reino Hulandes, di cual Hulanda ta miembro di NATO (NAVO na Hulandes), cu ta mobilisando contra Rusia den un conflicto serio na nivel mundial!
