ORANJESTAD (AAN): Aruba Bank orguyosamente ta anuncia su donacion di 10.000 Florin pa financia parti di e expansion di Neptali Henriquez Park.
E iniciativa aki ta refleha e compromiso di Aruba Bank pa cu e desaroyo di comunidad y bienestar di residentenan di Aruba.
Neptali Henriquez Park a keda funda na 1974 pa Señora Florence Wekker y oficialmente a worde habri na 1984 pa Su Mahestad Prinses Margriet di Hulanda. E park a keda un lugar aprecia pa comunidad desde e tempo ey.
E donacion di Aruba Bank ta yuda cu e expansion pa crea un espacio dedica na muchanan di 2-5 aña, stimulando inclusividad y desaroyo integral. E proyecto ta inclui stacionnan di hunga adapta pa muchanan, caminda por acepta te cu 81 mucha simultaneamente riba 26 diferente cosnan di hunga. E stacion di hunga educativo ta enfatisa riba siña door di hunga, introduci conceptonan di ingeniero y ciencia cu ta tuma lugar pafor.
E donacion aki ta marca e prome na e proyecto di expansion, unda cu Aruba Bank ta spera di por inspira mas compania pa aporta na e bunita proyecto aki di expansion pa e parque cu ta suma un total di 130.000 Florin.
Roxanne Croes di Aruba Bank tabata presente pa haci entrega di un cheque simbolico na e miembronan di board di Neptali Park, marcando un comienso di un aliansa dedica na crecemento y enrikecemento di nos comunidad. Pabien na Neptali Henriquez Park cu e bunita proyecto aki.
