ORANJESTAD (AAN): Recientemente Minister di Husticia y Asuntonan Social Rocco Tjon,
a firma un Memorandum of Understanding (MOU) cu Bonaire, pa asina forma un aliansa pa traha mas di cerca cu otro pa loke ta trata ambos Family Justice Center. A haci palabracionnan concreto pa loke ta trata e parti di opleiding y training como tambe pa e parti di comparti experticio y conocemento cu otro, pa esaki por tuma luga mas frecuentemente.
Segun Minister Tjon, loke ta hopi importante tambe ta, cu ta bay traha mas y mas den cooperacion cu otro ora ta trata e topico aki, caminda ambos organisacion kier eleva siguridad pa victimanan di violencia pero na mes momento tambe percura pa e parti di “accountability” pa e malhechornan ta uno mas grandi.
Hopi biaha ora ta trata e topiconan aki, e parti di financiamento tambe ta uno importante y den cuadro di esaki a concorda cu otro, pa haci e peticionnan pa fondonan internacional hunto. E motibo pa cu esaki ta cu pa e tipo di peticionnan aki wordo honra, e ta exigi un cierto nivel di experticio.
Por conclui cu tabata un momento sumamente importante, caminda hunto cu Boneiro ta bay traha mas di cerca cu otro, pa hunto combati violencia domestico, violencia relacional pero tambe percura pa tin mas miho atencion pa victimanan di abuso di violencia y abuso en general.
