Comunidad tin un deber di haci tur esfuerzo pa sostene HOH
*Sosten pa salto historico di Horacio Oduber Hospital y Imsan
*Cuido di Hospital di Aruba di moribundo a bira luz pa futuro
ORANJESTAD(AAN)—Uno di e logronan mas grandi di Gobierno Evelyn Wever-Croes y hasta den historia di Aruba, ta sin duda Horacio Oduber Hospital y Imsan.
Ora analisa e posibilidadnan cu Hospital di Aruba y Imsan na San Nicolas tabata tin pa cumpli cu nan deber, na momento Gobierno Mike Eman a entrega gobernacion na Gobierno Evelyn Wever-Croes, mester bolbe na publicacionnan den DIARIO.
Uno di e mihor produccionnan pa cualifica Gobierno Mike Eman, tabata sin duda e proyectonan Bo Aruba, cu a entrega na Pueblo di Aruba e prueba pakico Aruba a drenta estado di bancarota pero tambe di caida total.
Hospital Horacio Oduber tabata uno di e proyectonan di e bofon y abuso mas grandi cu historia di Aruba a conoce riba tereno politico, cu tabata e proyectonan BBO, cu a nace como fantasia politico optimal den e maneho di Gobierno Mike Eman.
Hospital Horacio Oduber ta parti di berdadnan cu nunca mester muri of wordo haci invisibel pa generacionnan nobo di Aruba, cu lo no por comprende con Aruba por a sobrevivi hasta un pandemia despues di e desastre cu Gobierno Evelyn Wever-Croes a ricibi di Mike Eman.
Awe credito mester wordo duna na e tremendo labor di Ministro di Salud Publico Dangui Oduber y na e profesional Jacco Vroegop cu el a atrae pa por a scapa e alma di Salud Publico di Aruba, cu ta Hospital Horacio Oduber y Imsan na San Nicolas.
E momento a yega pa Aruba transforma su mes den un centro medico pa e region di Caribe y asina ricibi e sosten financiero necesario pa por sigui crece den e mundo medico cu continuamente conoce exigencianan nobo pa por sirbi humanidad.
Informacionnan cu DIARIO a ricibi ta indica cu na e momentonan aki, Hospital di Aruba y Imsan mester cuminsa trata na atrae turistanan di otro paisnan, cu na Aruba den un clima agradabel y den un situacion politico trankil, por duna atencion medico cu e nivel di acreditacion necesario y sigur cu e posibilidadnan cu e participacion di Aruba den Reino Hulandes ta nifica.
E necesidad pa bon tratamento medico ta sigui presenta su mes no solamente na paisnan pober, pero hasta na paisnan grandi caminda personanan cu bon entrada cu a wordo afecta pa condicionnan di salud, ta busca alternativanan pa nan por busca nan salud.
Segun informantenan clave, e momento a yega pa HOH habri porta pa consolida su mes como un instituto medico di nivel halto, cu por ofrece cuido medico di calidad pafor di su teritorio Arubano!
