ORANJESTAD (AAN): Procurador-General di Aruba, Alto Comisario di Polis y director di Stichting Reclassering en Jeugdbescherming a firma diamars e maneho nobo titula Gezamenlijke Aanpak Jeugdcriminaliteit.
Cu e maneho aki e tres instancianan a fiha formalmente con Polis, Ministerio Publico y Reclassering mester actua desde prome momento cu un persona menor di edad drenta den contacto cu husticia.
E documento ta describi e afspraaknan di colaboracion entre e instancianan y ta encera liñanan di maneho pa trata cu sospechosonan menor di edad.
E enfoke principal ta riba prevencion: evita cu un hoben, despues di un prome incidente, bolbe drenta den contacto cu polis.
Durante e firmamento diamars, Procurador-General a bisa: “Mi tin gran curason pa hobennan y nan futuro”, subrayando e importancia di intervencion tempran y di prevencion.
Alto Comisario di Polis tambe a pone accento riba prevencion. Director di Reclassering a uni cu e mensahe aki y a bisa cu bon colaboracion ta esencial pa duna hobennan mihor perspectiva.
Por bisa cu Aruba, cu formalisacion di e maneho, a pone un paso importante pa traha mas preventivo y dirigi riba futuro den e lucha contra criminalidad di hoben.
Foto (di robez pa drecha): señora Pemberton-Leonard (director Stichting Reclassering), señora Flanegin (Procurador-General di Aruba) y señor Arnhem (Alto Comisario di Polis)
