ORANJESTAD (AAN): Riba di Betico, na Museo Archeologico Nacional Aruba tabata tin varios actividad hopi interesante y entre nan e apertura di e exposicion di e artista Sharelly Emanuelson.
El a conta durante un entrevista cu DIARIO cu el a presenta na MANA un instalacion cu yama 'Tene A', cu ta parti di un coleccion di potret cu e ta mustra na Hulanda y riba Dia di Betico el a presenta nan na Aruba di un forma adapta.
Segun Emanuelson, tambe tabata tin 3 sesion interactivo cu publico caminda e ta haci un presentacion riba e investigacionnan cu e ta haciendo durante e aña aki.
Esaki ta e prome presentacion ta bay tin dos mas, un na juni y otro na december na MANA. E presentacion ta basa den e potretnan cu a wordo saca y e investigacion riba 'Biba dushi den mal tempo'. E ta parti di un grupo di investigadonan cu ta studiando e cambio climatico y e adaptacionnan riba e islanan ABC y SSS.
E investigacion ta pa pone mas bista riba e propio procesonan, pensamentonan y representacionnan cu ta bay tin pa loke ta cambio climatico. Su trabao como artista den e grupo ta esey, a expresa.
