ORANJESTAD (AAN)- Posiblemente, cu excepcion di e grupito cu ta contra e vacunanan anti-Covid-19, por bisa,
mirando e reaccionnan cu a drenta na mesa di redaccion di DIARIO, cu den pueblo ta reina un disgusto enorme cu e argumentonan di director di Hospital dr. Horacio Oduber.
No solamente el a falta respet di Crisis Team, cu ta haci un trabao inmenso pa yuda controla e pandemia, pero pa su mesun persona di prome linea, y pa e pueblo di Aruba en general. E hecho cu el a bisa cu tur hende ta nace pa muri” no a cay den bon tera pa comunidad, pasobra aunke muri ta e unico cos sigur cu tin den bida, e no mester ta precisamente door di Covid-19 y bao circumstancianan hopi doloroso pa e pashent y su famia, cu e sernan humano mester bisa ayo na nan bida.
E pregunta cu ta wordo haci ta si asina e ta papia den seno di su famia, sin ningun gevoel. Dificil pa kere cu e no a encurasha su famia (manera mester ta) pa vacuna, pa sikiera tin un tiki mas di defensa, vooral contra omicron. Y e director mes, e no lo a vacuna? Tur hende cu tin su famia na pecho, y tambe tur otro ser humano (nan prohimo) ta haci nan best pa tur hende na cas ta vacuna, y hasta ta encurasha bisiñanan pa haci esaki.
Pues, masha decepcionante cu HOH ta wordo maneha pa un persona cu un mentalidad asina mesquino! Asina algun opinion publico, tocante e opinion di e funcionario aki.
