Minister di Asunto Social gradici y orguyoso:
ORANJESTAD (AAN)-- Diabierna 5 di December, a tuma lugar e apertura oficial di e edificio nobo di Departamento di Asunto Social (DAS), na Lagoen, y alavez a inaugura e logo nobo.
E staf y personal di DAS tabata hopi contento cu e logro aki, y tambe cu presencia di Minister Mervin Ras, titular di Asuntonan Social y Salud Publico, cu ademas e mes su profesion ta Trahador Social.
E dignatario a hiba palabra di apertura y a expresa cu esaki ta un paso stratgegico dilanti, pa amplia e accesibilidad y garantiza un servicio mas digno, humano y eficiente na nos ciudadanonan.
Durante e ceremonia a destaca DAS su compromiso pa calidad y bon servicio, sosteni for di e fundamentonan di envolvimento, confianza, comunicacion, responsabilidad y colegialidad.
E mandatario a expresa su orguyo pa mira un desaroyo positivo den e area social, y a felicita e directora di DAS señora Rosanna van Dijk y su personal pa nan dedicacion na pueblo di Aruba.
{gallery}Apertura Edificio nobo di DAS na Lagoen, y inauguracion di e Logo nobo{/gallery}
