Director di Aduana Roderick Croes a splica:
*Gobernador lo avisa Croes pa hacie
ORANJESTAD (AAN) – E asunto di huramentacion di ambtenaarnan di Aduana cu mester a keda pendiente, ta parce cu no tin di haber cu ningun problema cu e director, sino cu algo nobo cu huramentacion.
Den entrevista cu DIARIO, señor Roderick Croes, director di Aduana, e mes a elabora tocante e tema, y a splica kico ta tumando lugar.
Na prome lugar, Croes a menciona cu generalmente, e huramentacion ta wordo tuma door di Gobernador, pero den e mesun articulo ta ser bisa cu Gobernador por duna e Hefe di Departamento mandato, pa por huramenta su empleadonan, pero ta custumber tambe cu Gobernador no ta tuma e tempo pa huramenta tur ambtenaar, mas tanto e ta tene su mes na huramenta e hefe di departamento of e personanan cu ta traha como Huez, etc. Kiermen, mas tanto esnan cu tin un funcion hopi mas halto.
“Anto, normalmente, semper e ta duna un mandato na e Hof van dienst pa huramenta e ambtenaarnan”, el a reitera.
Den e caso cu e huramentacion no a bay door, señor Croes a señala cu Gobernador a bis’e cu e mandato cu e tin di 2017, ainda ta valido y e lo por huramenta e ambtenaarnan di Aduana. “Sinembargo, nan ta trahando riba lineanan nobo cu huramentacion. Tin hopi ambtenaar cu mester wordo huramenta pero nan a tene nan un rato pasobra nan kier pa wordo huramenta bao e lineanan nobo cu ta bay tin”, señor Roderick Croes a menciona.
El a agrega cu p’esey Gobernador a pidi pa tene esnan di Duana tambe un rato, te ora cu tur e lineanan nobo ta cla. Y asina nan ta cla, director di Aduana lo haya informacion cu e huramentacion por bay door.
Esaki ta e ultimo grupo cu a slaag aña pasa, y ta consisti di mas of menos 14 hende, y tin un grupo prome cu tambe mester wordo huramenta, ademas di un persona cu ta traha den e parti administrativo.
