LONDRES: Autoridadnan di Curaçao y Hulanda ta violando derecho di e Venezolanonan cu ta buscando proteccion na e isla chikito den Caribe,
segun un rapport nobo encuanto derechonan humano cu a wordo emiti Dialuna siman pasa dia 11 di October 2021, y cu a documenta 22 caso di abuso cu Venezolanonan a sufri na e isla, incluyendo muchanan.
E rapport ta bisa cu autoridadnan Hulandes y di Curacao a viola e derecho di Venezolanonan cu ta buscando proteccion internacional na e isla. E rapport yama ‘Still no Safety: Venezuelans denied protection in Curaçao”. Aki ta mustra con a viola derechonan humano di e personanan aki, incluyendo detencion automatico bao di condicionnan inhumano, trato malo, separacion di famia, y nenga nan derecho di busca asilo.
Como 5.7 miyon Venezolano a huy di e crisis di derecho humano na nan pais, haciendo esaki un di e movimento di mas grandi di refugiado na mundo. Ta ser calcula cu como 17.000 Venezolano ta bibando cu status migratorio iregular riba e isla.
“Ta inaceptable cu Reino Hulandes a sostene autoridadnan di Curacao di intercepta, detene, y deporta hendenan cu a huy di Venezuela enbusca di seguridad. Envez di tapa nan wowo y no mira con e derechonan humano aki ta wordo viola, nan ta kere cu autoridadnan Hulandes mester percura cu nan ta ricibi e proteccion internacional cu nan mester,” ta loke Erika Guevara-Rosas a bisa, kende ta e director pa Americas na Amnesty International.
Mesun situacion ainda: Amnesty International a descubri cu e situacion di Venezolanonan buscando proteccion na Curaçao no a mehora desde cu nan a publica e rapport ‘Detained and Deported’ na 2018. Aunke Curaçao a introduci un procedimento nobo di proteccion internacional, keto bay e no ta cumpliendo cu standard y leynan di derechonan humano.
Por ehemplo, Venezolanonan cu ta huy di e crisis ainda ta wordo deteni automaticamente pa periodonan indefini di tempo, den cual nan ta wordo poni bao presion pa firma documentonan pa duna OK pa nan wordo deporta y nan tin masha poco acceso na asistencia legal. E entrevistanan pa dicidi kende ta haya proteccion, ta wordo haci pa ambtenaar cu tambe ta encarga cu aresto di stranheronan cu status iregular migratorio. Te asina leu e procedimento nobo a djis produci rechazo di aplicacionnan pa status protehi. Amnesty International ta hopi preocupa cu Curaçao ta manda hende bek Venezuela unda nan tin mas riesgo di pasa den violacionnan pisa di derechonan humano.
Amnesty International ta denuncia e situacion inhumano na e baraknan di detencion na Curacao cu ta demasiado yen, y cu e refugiadonan ta wordo encarcela mey-mey di criminalnan condena, y tambe casi no tin privacidad. Amnesty a denuncia cu cuidadornan di preso ta trata nan na un forma inhumano y degradante, manera abusonan fisico y verbal y cu ta obliga nan bula mescos cu dori ora cu nan ta sunu.
