PEKING: Un grupo di olifant salvahe a haci posible cu Polis a logra localiza y detene un grupo di persona kendenan a cruza e frontera chines na forma ilegal, segun e corant Global Times a indica.
Ora cu autoridad a haya informacion cu un grupo di olifant ta canando den area di un caretera den e provincia di Yunnan, Polis a usa un drone pa vigila for di halto e movimento di e animalnan aki.
Pero net ora cu e drone, cu ta equipa cu un camera y transmitiendo en bibo, tabata sigui e paso di e animalnan, Polis a mira riba pantaya e imagen di cinco sospechoso cu lo a cruza e frontera den forma ilegal.
Polis a core sali cu un unidad pa bay na e area unda e olifantnan ta, y aki a detene e cinco personanan aki. Oficialmente nan no a bisa ta di ki nacionalidad e hendenan ta, pasobra e caso ta bao investigacion.
E provincia yen di sero na Yunnan tin frontera cu Vietnam, Laos, y Myanmar, y desde cu e pandemia a cuminza, cruzadanan ta cera bao di e strategia di China di cero-Covid, cu e meta pa evita cu casonan nobo di Coronavirus ta drenta for di exterior.
E provincia ta conoci tambe pa e hecho cu regularmente bo por mira olifant ta cana rond.
Aña pasa un grupo di olifant a cuminza un migracion di zuid pa e parti nort di e provincia, y imagennan di animal cu ta canando den seronan di Yunnan a captura atencion di prensa na China y internacional, y tambe social media.
Segun China, awor tin como 300 di olifant wild cu ta biba na Yunnan y cu ta cay bao di Proteccion Estatal nivel A (esun mas halto na China). Esaki ta 107 mas olifant compara cu 1980.
