ORANJESTAD (AAN): Algemene Rekenkamer a publica su Relato Anual pa aña 2020.
E relato ta duna un resumen di e trabounan y actividadnan ehecuta durante aña 2020. E publicacion di nos Relato Anual no ta solamente paso e ta un exigencia stipula pa ley, pero pa motibo cu nan kier pone enfasis riba nos balornan fundamental, cu ta: integridad, obhetividad, transparencia, abierto y profesionalismo.
Pa Algemene Rekenkamer tambe aña 2020 tabata special. E pandemia di COVID-19 cu a presenta, a trece cune algun medida drastico pa e instituto. Door di e pandemia Algemene Rekenkamer mester a cambia su programa di investigacion y tambe su manera di traha.
Den e relato Algemene Rekenkamer ta para keto un rato na e actividadnan mas importante y e desaroyonan cu a haci durante e aña cu a pasa. A describi e - samenstelling en opzet - di e instituto. Algemene Rekenkamer ta splica tambe e diferente investigacionnan cu a haci durante henter e aña y tambe ta haci mencion di e accionnan den cuadro di e plan strategico 2019-2022. Ta elabora extensamente riba e procedura di – werving en selectie – pa atrae miembronan (suplente) pa College den e relato. Un paso importante cu a haci durante aña 2020 tabata pa establece un maneho di integridad, e codigo di conducta y e firmamento di e declaracion di integridad.
Banda di e informacionnan organisatorio ta elabora den e relato riba e momentonan di contacto cu e stakeholders di Algemene Rekenkamer. E relato ta duna claridad ariba e agotacion di e presupuesto. Na final ta duna un bista completo ariba e administracion financiero y un evaluacion di e accountant pa aña 2020.
Algemene Rekenkamer ta desea cu tin confiansa den su investigacionnan y productonan door di comunica abiertamente y transparente. Algemene Rekenkamer ta habri pa ricibi reaccion di otro pa di e forma aki garantisa y fortalece un calidad halto di e instituto y su funcionamento.
Contenido completo di e relato ta disponibel di forma digital ariba su website www.rekenkamer.aw.
