ORANJESTAD (AAN): Aki dos siman, esta Diamars 15 Maart 2022, Arubaanse Verening van Fysiotherapeuten (AVF) lo tene su eleccion di un Directiva nobo pa e siguiente 3 aña cu ta stipula den nan Statutanan.
Na ultimo parti di aña 2021, AVF tabata hopi den noticia pa cu e cambionan cu AZV lo kier (a) haci den su pakete Basico pa cu Fysiotherapie. En conection cu esaki, AVF ta hopi agradecido cu por a reuni cu Minister di Salubridad, sr. Dangui Oduber, prome cu tur e cambionan lo tuma lugar, den cual nan a splika nan rol importante pa nos communidad cu emphacis ariba e movecion fysico y keda fit y saludabel, y alavez tambe pa forma di therapianan cu no solamente ta yuda e pashent recupera di su dolor y inconvenencia muscular y of joint, pero pa na mes momento preveni cu un pashent lo mester opera por ehempel ariba un edad ‘jong’ y hopi biaha inecesariamente.
En corto: Fysiotherapie ta ta yuda e cliente den un forma curativo y tambe preventivo di cual AVF y Minister ta ariba un linea.
Mirando cu e dianan ta acercando, e Directiva actual ta manda hopi exito na cada miembro cu ta y of tin e deseo pa postula su mes pa un puesto den esaki.
Finalisando, Directiva vigente ta gradici tur su miembronan pa e sosten cu nan a ricibi den e añanan cu a transcuri y ta spera cu e siguiente lo continua cu animo y positivismo pa sigui logra su metanan stipula pa cu nan profession di Fysiotherapie.
