Segun Rubin Ponson di DOW:
ORANJESTAD (AAN): Señor Rubin Ponson di DOW a confirma den un entrevista cu DIARIO cu tur peticion pa importacion di klapchi a wordo entrega y procesa. Segun Ponson, tur importador a ricibi nan permiso di importacion caba.
El a indica cu e cantidad di klapchi cu lo wordo importa e aña aki ta mantene mas o menos na mesun cantidad cu añanan anterior, cu un promedio anual di alrededor di 16 pa 18 container.
Ponson a expresa su speranza cu e aña aki no presenta complicacionnan na China, manera a sosode den añanan anterior, sea relaciona cu produccion na fabricanan of cu transporte. El a splica cu un explosion grandi cu recientemente a tuma luga den un fabrica na China a resulta den ahustamento di diferente regla y procedimento den e pais, algo cu eventualmente por causa retraso pa logra saca e containernan na tempo.
Sinembargo, segun Ponson, tin indicacion cu un cantidad chikito di container ya ta cla pa sali rumbo pa Aruba, mientras cu ta haci esfuerso pa logra saca e otro cargamentonan lo mas pronto posibel.
Na e momento aki, el a splica, e proceso ta depende principalmente di e keuring di e klapchinan na China y di cumplimento cu e reglanan di transporte necesario pa por manda e cargamentonan pa Aruba.
Ponson a enfatisa cu transporte di klapchi semper ta representa un reto, debi cu no ta tur compania of barco ta acepta transporta e tipo di carga aki. E companianan cu si ta ofrece e servicio ta opera bou di diferente regla y condicion estricto, locual por haci e proceso mas complica.
“Mi ta kere cu ainda ta buscando un manera y tin suficiente tempo pa manda e cargacionnan di klapchi pa Aruba prome cu temporada di klapchi cuminsa na December,” Ponson a enfatisa.
