Premier Wever-Croes --- *Traha na cas toch ta un tema riba mesa
ORANJESTAD (AAN): Tin indicacion di hopi contagio cu ta tumando lugar na pia di trabao. Relaciona cu esaki Prome Minister Evelyn Wever-Croes a duna di conoce cu gobierno y Crisis Team a reuni riba e tema aki y ta asina cu na e momentonan aki no a yega ainda na e punto cu tin cu bay over na 'thuiswerking' (traha na cas).
E ta riba mesa, a bisa, ainda, e mandatario a indica.
Door cu e efectonan di omicron ainda ta suave ta purba di busca e balans cu e aspecto economico ya cu 'tuiswerking' lo tin su impacto economico vs. salud. Esey lo keda aspecto pa pone den balans constantemente, Wever-Croes a remarca.
Pa awor, e medida aki no ta un posibilidad, pero ta keda un evaluacion di tur dia. E Ministeriele Regeling ta cambia cada 3 dia y kier warda otro siman cu ta e siman cu tur hende ta bek na pia di trabao pa mira con e situacion ta, Prome Minister Evelyn Wever-Croes a expresa.
Por ehempel, tin casonan caminda tin personanan cu mester presenta na trabao y por ta nan no kier pa motibo cu tin basta oficina unda no por habri e bentananan pa haya ventilacion.
Segun e mandatario, den e casonan ey, esaki ta motivonan legitimo y mester bay den consulta cu e doño di trabao pasobra no a bay over na 'traha na cas' ainda, pero si e deber ta pa tur doño di trabao percura pa na pia di trabao ta safe pa traha.
Mester por tin ventilacion, distancia, hand sanitizer, uza tapaboca. Esey ta algun di e rekerimentonan cu ainda ta den e Ministeriele Regeling, e mandatario a enfatisa.
