Presidente di Parlamento Edgard Vrolijk:
ORANJESTAD (AAN) Den entrevista cu DIARIO, Presidente di Parlamento, Edgard Vrolijk, a referi tambe na e proyecto cu tin pa basta tempo caba, pa independiza Parlamento.
Esaki ta un asunto cu Edgard Vrolijk mes tabata trahando riba dje, y el a expresa “si e tabata den man di mi mama e lo tabata cla pa basta tempo caba”, pero e ta den man di 21 parlamentario cu mester cuminza pa haci e cambionan, cual proceso a keda cla, y e documentonan ta na DWJZ, y tur hende sa cu nan ta tarda hopi akinan. Esaki mester bay Hulanda ainda, y tur ley mester concuri cu otro. Vrolijk a agrega e coleganan cu ta bin cu pensamentonan di otro paisnan europeo, cu no ta malo pero nan ta lubida cu Aruba ta den Reino Hulandes y cu na final di dia pa haci’e mester ta independiente tambe. “Tanten cu ta den Reino bo tin cu cumpli cu leynan di Reino y no mag di ta contra statuto”, Vrolijk a acentua.
Un bez cu e documentonan ta bek nan por atende esaki den Parlamento di Aruba, y djey e unico fase cu falta ta bay den man di DRH pa defini e funcion di cada hende y con e ‘stappenplan’ lo wordo poni pa e trahadornan cu ta den parlamento caba y esnan cu ta bin nobo, y e ora ey e proceso lo keda cla.
“Ami lo haci mi maximo esfuerzo pa na 2024 ta lo mas leu posible, pero si no, e next presidente tin hopi fase djis pa termin’e” el a expresa y a señala cu den tres aña el a cumpli cu e metanan cu el a bin pa haci, y e ta cla pa otro retonan tambe.
Vrolijk a splica cu tin un parti den front di e edificio di Parlamento cu no por uza mas, y cu tempo mester haci’e completamente nobo. Parlamento poco a poco a wordo amplia y mientras den pasado tabata tin dos fraccion so awo tin cinco, y den futuro entre mas e ciudadanonan vota pa otro partidonan nobo cu cada bez ta bin acerca, mas fraccion lo y mester amplia mas e espacio. Segun Presidente di Parlamento, e ta kere cu na aña 2026, Edificio di Parlamento lo ta completamente adapta na cambionan nobo, aunke kizas e mes lo no tey den tres e lo laga un joya di edificio. El a aclarea cu Parlamento no ta un monumento.
