Asociacion AHATA papiando cla y raspa
ORANJESTAD (AAN): Ultimo dianan, Aruba Hotel & Tourism Association a participa den 3 ronda di conversacion cu Minister di Turismo, Transporte, y Labor, y su conseheronan. Despues di cada ronda, e ministerio a sigui desaroya nan plan pa turismo. AHATA ta aprecia cu Minister kier implementa un rumbo nobo pa turismo, pero nos a expresa varios biaha cu nos no ta mira nos recomendacion refleha den e documento di gobierno.
E diferencianan principal entre e Plan di gobierno y AHATA su recomendacion, ta:
(1) Gobierno su strategia ta pa sigui crece den cantidad di turista, mientras cu ta purba crece e contribucion financiero di cada turista. AHATA ta boga pa un strategia cu ta stop di crece e cantidad di bishitante y ta alinea entidadnan di turismo pa logra:
(A) Mercadeo cu ta mengua e cantidad di turista cu ta contribui menos y reemplaza nan cu bishitante cu ta contribui mas na nos economia y ta aprecia naturalesa y cultura.
(B) Reduci y controla e cantidad di cruiseship cu ta yega Aruba riba mesun dia.
(C) Controla e cantidad di avion cu ta yega riba cierto dia y priorisa cierto aerolinea.
(2) E Plan di gobierno ta inclui hisa varios impuesto den sector di turismo. AHATA ta observa cu gobierno mester enfoca riba nan maneho di entrada en bes di hisa impuesto pa esnan cu ta paga caba. Gobierno mester priorisa nan gastonan mas efectivamente y mehora control di cumplimento di impuesto. Un estudio di gobierno mes a revela cu 20% di Aruba su economia ta opera ilegal, sin paga impuesto.
(3) Gobierno tin intencion di crea varios organo nobo relaciona cu turismo den gobierno. AHATA ta boga pa evita di crea mas departamento y burocracia, y mehora efectividad di e structura existente.
(4) Gobierno tin intencion di sera beach y laman un dia pa luna, locual expertonan di naturalesa no ta considera un medida efectivo pa regeneracion. En bes di un medida di “greenwashing” cu ta simbolico y no practico, AHATA ta boga pa controla e cantidad di bishitante cu ta yega Aruba, locual lo mitiga e presion di usuario riba nos beach y laman.
AHATA ta di opinion cu mester di un cambio urgente den strategia di turismo pa proteha e futuro di Aruba su industria principal y sigura e bienestar di nos comunidad. Ora nos participa den ronda di stakeholders, nos tin e expectativa cu ta balora nos recomendacion y ta tuma nos participacion y contribucion na serio. Nos ta lamenta cu e reunionnan pa strategia di turismo no a resulta na un plan cu ta inclui e vision di e representante di industria turistico
