ORANJESTAD (AAN): Como parti di e compromiso continuo pa mehora e experiencia di cada pasahero, Aeropuerto di Aruba ta
preparando pa habri su terminal di check-in pa Merca nobo pa e operacionnan di aerolinea y pasahero. Pa garantisa un transicion eficiente, Aeropuerto di Aruba, den colaboracion cu Chrysalis Global Consulting, un specialista den Operational Readiness and Airport Transition (ORAT), a realisa un serie di simulacro.
\ E pruebanan aki, conduci durante un siman, a involucra diferente pasahero boluntario cu a participa den e procesonan di check-in di prueba. Esaki a permiti Aeropuerto di Aruba test y refina diferente aspecto di e terminal nobo di check-in, entre otro e sistema di maneha maleta y fluho di pasahero. E pruebanan a duna bista valioso riba e eficiencia y efectividad di e facilidadnan nobo, sigurando cu tur sistema ta optimalisa pa e lansamento oficial.
E lansamento exitoso di e facilidad nobo aki ta posibel pa medio di e colaboracion y dedicacion di partnernan di aerolinea y “ground handlers”, cu ta hunga un rol crucial den garantisa un transicion suave pa e biaheronan. Nan sosten y participacion continuo den capacitacion y prueba ta esencial pa completa e fasenan final di preparacion cu exito.
Entrante diamars, 8 di april 2025, lo inicia cu e pre-apertura. Riba e fecha aki, tur compania di aviacion cu General Air Services como “ground handler” lo haci transicion pa e terminal nobo di check-in. Esaki ta inclui Delta, United Airlines, Southwest Airlines y Spirit. Pa diamars, 29 di april 2025, ta anticipa cu tur transportado Mericano, incluyendo esnan cu AGS/Swissport como “ground handler”, lo ta operando for di e terminal nobo di check-in. E fase final di e transicion lo inclui JetBlue y American Airlines.
E proceso pa implementacion ta lo siguiente:
Maart – Finalisacion di training y prueba cu e team di Aruba Airport Authority (AAA), e aerolineanan y ground handlers.
April – E teamnan di aviacion inicial ta cuminsa cu e operacionnan den e terminal nobo di check-in.
Mei – Apertura completo, ofreciendo un experiencia di check-in mas trankilo y eficiente pa tur biahero cu ta bay Merca.
“E transicion aki ta marca un logro significativo den e esfuersonan continuo pa engrandece e experiencia di aeropuerto. Door di traha estrechamente cu e partnernan di aerolinea y ground handlers, ta pone tur sistema na nan luga pa brinda e pasaheronan un proceso di check-in mehora”, asina Marylou Van der Linden, Operations Manager na Aeropuerto di Aruba a expresa.
Ta gradici e pasenshi y cooperacion di e pasaheronan y tur stakeholder mientras ta finalisa cu e preparacionnan. Lo comparti mas detaye den e proximo simannan segun cu e apertura completo na mei ta acercando.
