ORANJESTAD (AAN): Un compania na Colombia cu ta existi mas di 40 aña caba haciendo vuelonan charter y tambe di Air Ambulance, awor kier drenta arena di haci vuelo comercial.
Nan a caba di keda cla cu nan Certificado di AOC (Air Operator Certificate) pa por cuminza haci vuelo comercial. Ta trata di e compania Sarpa.
Pues awor nan ta bira un aerolinea! E president di Sarpa, esta Carlos Andres Mesa a bisa cu Aeronautica Civil di Colombia a certifica e aerolinea pa cuminza cu vuelonan comercial regular for di Medellin (aeropuerto di Rionegro) na comienzo cubriendo ruta pa Aruba, Curaçao, y Barranquilla, y demas destinacion na Colombia mes y cu nan lo anuncia despues.
Pa e rutanan, e.o. pa Aruba, nan ta sperando di haya autorizacion pa bula 21 ruta nacional y internacional den siguiente dianan.
Den e prome aña, nan lo pone 150.000 asiento disponible, y aki nan ta spera di por bay transporta 120.00 pa 130.000 pasahero, generando un operacion directo simple y evita di bula na Aeropuertonan di conexion, y reduciendo costo di viahe asina entre 20 te cu 30 porciento.
Como cu nan ta bula direct pa e destino, nan lo reduci e tempo di spera di pasaheronan na Aeropuerto.
Segun Carlos Andres Mesa, Sarpa lo keda mantene nan negoshi di charter, y tambe nan negoshi di Air Ambulance. Pero awor ta agrega e di tres negoshi cu ta aerolinea comercial regular.
