Lo tin hopi di ofrece y sigur cuminda di Pasco:
ORANJESTAD (AAN) – Señor Adri Berg, encarga cu Centro di Bario Piedra Plat, a expresa den conferencia di prensa yama pa CEDE Aruba y IBiSA, en conexion cu e proyecto Ban Caya, cu e ta sumamente gradici cu CEDE Aruba, cu a scoge e Bario di Piedra Plat pa haci e segundo “Ban Caya”.
Berg a bisa cu esaki ta den un bon momento, pasobra e ta den e temporada di Pasco. “Nos como Centro di Famia Piedra Plat hunto cu Centro di Bario Piedra Plat, ta uni hunto cu CEDE y tur otro stakeholders pa haci e actividad aki, cu ta pa prome biaha cu ta bay sosode den Bario di Piedra Plat, unda cu e caminda ta bay wordo cera.
Un cos bon di Piedra Plata ta cu e ta meymey di Paradera cu Santa Cruz. Dos bario hopi grandi. Pues, asina ta, nos ta invita e distritonan Paradera y Santa Cruz, hunto cu tur e otro barionan rond di nos pa e actividad aki, cu nos ta bay tin”, señor Adri Berg a relata.
El a bisa cu manera a word bisa caba, e Centro di Bario Piedra Plat ta bay trece dilanti kico e bario di Piedra Plat y vecindario ta ofrece na comunidad.
“Por ehemplo, nos tin un programa akinan cu ta Huiswerk Begeleiding, pa muchanan di scol basico y secundario. Nos tin un scol di musica, tambe un club di mucha cu yama Oanza, y un programa pa 60 plussers. Nos tin un programa cu ta draai henter e aña escolar, y riba e dia eymes (Ban Caya) varios di nos habitantenan tambe a join nos y riba caminda ta bay tin diferente tent y mesa, cu lo bay ofrece cosnan dushi, y crioyo di temporada di Pasco, manera sous, hayaca, etc. Ta bay tin artesania, benta di paña, zapato, arte, sopi, un tent cu cuminda saludable.
Si bo ta bay bin aki dia 10, mi ta sigur cu bo ta bay bek satisfecho den sentido di e cumindanan cu nos ta bay ofrece y nos mes, como Centro di Famia Piedra Plat, e dia aki nos lo haci uso di oportunidad pa bende plato navideño grandi na bon prijs”, señor Berg a duna di conoce.
