ORANJESTAD (AAN) — Mas y mas DIARIO ta wordo acerca dor di sigur hobennan, cu ta trece dilanti cu tin un cambio importante di e personanan cu por vota.
Cada eleccion cu pasa conoce cambio di votadonan. Ta bini votado nobo pa motibo di nacemento loke ta haci cu nan no tabata na bida ora partinan importante di historia di Aruba a desaroya. Tambe mester tene na consideracion migrantenan cu ta bira parti di comunidad cu derecho di voto y no ta na haltura di kico a pasa den historia di e pais.
A base di articulonan cu DIARIO ta publica riba e realidad di Aruba como pais, hobenan ta ripara cu informacion cu nan tin no ta cuadra cu loke ta bini dilanti.
Nan reaccion ta, cu mester bini un splicacion special pa hobennan prome cu eleccion pa splica con Aruba a cuminsa cu e lucha di separacion cu a nace den e partido AVP y cu a wordo dirigi door Henny Eman y su yiu Shon A Eman, pero despues a tranca.
Historia corecto di Aruba ta mustra con durante negociacionnan entre Antia Hulandes y Hulanda, e representantenan di Antia Hulandes mes tabata tin problema cu otro con ta bay habri caminda pa un futuro estatal nobo.
Segun nan ta trece dilanti mester bini prome cu eleccion programanan informativo pa splica e hobennan kico a pasa realmente cu Aruba y con Aruba a yega na Status Aparte.
Nan kier splicacion tambe di e forma cu e representacion di Aruba den Antia a cambia den transcurso di tempo.
Manera ta conoci ora e Staatsregeling 1948 a wordo introduci Aruba y Curacao tabata tin mes tanto asiento (8) den Parlamento di Antia.
Esaki a cambia cu e Interimregeling na 1950 ora den seno di Antia Hulandes mes no por a yega na un acuerdo nobo y finalmente Curacao a keda cu 12 asiento y Aruba a keda cu 8 asiento for di e tempo.
Na Aruba cambio politico a tuma luga cu surgimento di PPA, cu a traha riba e parti economico di Aruba mas bien y e situacion estatal di Aruba no a conoce cambio.
Den Parlamento di Antia, Curacao por a dicidi riba su mes cu su representacion di 12 miembro mientras Aruba hunto cu Bonaire y Islanan Ariba a keda cu un total di 10 asiento.
Aruba pues no a duna continuacion na e lucha pa separacion cu a muri te na 1971 ora Betico Croes a bini cu un formula nobo cu tabata Status Aparte. Ta a base di e lucha di Betico Croes, Aruba a enfrenta Reino na un forma severo y na Maart 1983 a yega na un areglo pa Status Aparte.
Atrobe Hulanda a trata di pusha Aruba contra muraya na 1983 pero Betico Croes a para firme y a mustra cu Aruba ta acepta su Status Aparte hasta si esaki ta exigi independencia.
Tabata Nelson Oduber como Prome Ministro di Aruba pues cu a logra deshaci di Independencia despues cu Aruba a haya e Status Aparte cu Betico Croes a logra.
Hobennan kier haya un bon splicacion di expertonan riba e tereno pafo di politica pasobra nan ta sinti cu hopi bes e forma cu historia ta wordo presenta no ta crea e aspecto real di loke a pasa.
Tambe nan kier mas informacion di e forma cu den caso di nombramento di Gobernador Boekhoudt, Reino Hulandes a pone e oportunidad pa Mike Eman presenta un candidato un banda ya cu Mike Eman no tabata honra e exigencianan cu cual mester a cumpli. Segun hobennan esaki ta temanan cu mester bini dilanti na un forma pa evita cu votadonan nobo, no conoce e berdad di historia di Aruba.
