ORANJESTAD (AAN) — Diaranzon 26 di Mei aki, un acuerdo entre Centro pa Desaroyo di Hende Muher (CEDEHM) y “Sociale Vormingstraject” (STV) of Formacion Social,
a keda firma den e sede mes di CEDEHM. En ocasion di e enlace di cooperacion aki, Minister Glenbert Croes, Titular di Asunto Social y Labor, y tambe di Cedehm y Formacion Social, a hiba palabra.
E mandatario a expresa cu e trayecto di formacion di hobennan femenino pa Formacion Social, ta un deal historico tambe pa CEDEHM, aworaki adicionalmente, apoyando Formacion Social den e trayecto si duna curso di “empowerment” entre otro, specialmente den e tareanan pa hende homber y hende muher.
E mandatario a expresa cu CEDEHM awe ta hopi mas empodera, unda cu como departamento nan tin un vision special, pa loke ta trata con pa empodera hende muher pa sobresali y realiza nan propositonan, soñonan y metanan den bida, y esey ta e motibo pa cual nan ta asina contento, cu Formacion Social cu su trayecto di hende homber y hende muher, ta bay brinda e ser femenino cu mester un extra sosten y empuhe, un oportunidad extra tambe si ta e di dos of e di tres, pa nan por para bek riba pia y duna nan mes un chens pa un futuro nobo.
Minister Glenbert Croes, como titular tambe di CEDEHM y Formacion Social, ta sumamente orguyoso di e trabao cu e instancianan aki ta desplegando. El a felicita Jessica Ras y su team di Formacion Social y Miangela Ras y su team di CEDEHM.
E dignatario a subraya cu pueblo di Aruba mester ta hopi contento y orguyoso pa mira con, finalmente, trayectonan di oportunidadnan nobo pa nos hobennan en general ta wordo crea den cuadro di di e cooperacion aki di CEDEHM y Formacion Social.
