Directora di FCVR, señora Esther Broeksema:
ORANJESTAD (AAN): A pesar cu poblacion di Aruba ta sigui crece, actualmente no tin necesidad di amplia e cantidad di unidad di shelter cu Fundacion Contra Violencia Relacional (FCVR) tin disponibel. Esaki segun directora di FCVR, señora Esther Broeksema.
Broeksema a splica cu inicialmente FCVR a cuminsa cu cinco unidad di shelter. Cu tempo, a constata cu tabatin necesidad di amplia e capacidad, y consecuentemente 11 unidad adicional a wordo agrega, pa un total di 16.
Sinembargo, segun e directora, den historia di e fundacion nunca tur 16 unidad a keda ocupa simultaneamente durante un periodo prolonga. Si a presenta periodonan den cual por lo menos 14 unidad tabata ocupa na mes momento, pero esaki no tabata pa un temporada largo.
Broeksema a enfatisa cu esaki ta tambe conforme e meta di un shelter, cual ta funciona como un refugio temporal. Durante nan estadia, clientenan ta ricibi guia y sosten pa empodera nan, fortalece nan independencia y prepara nan pa eventualmente sali for di e situacion di violencia den cual nan tabata bibando.
“Pa e momento, e 16 unidadnan di shelter ta suficiente. Sinembargo, nan mester wordo renoba pa bira mas adecuado pa e necesidadnan di nos clientenan,” Broeksema a expresa.
FCVR a ricibi e fondonan necesario di Gobierno di Aruba pa ehecuta e renobacion. E contratista encarga cu e proyecto ta cla pa inicia cu e trabaonan y, conforme planificacion, ta spera cu e renobacion lo por keda completa pa fin di aña.
