ORANJESTAD (AAN) – Ronella Croes, CEO di ATA, a sigui splica den conferencia di prensa cu Oficina di Turismo y autoridadnan concerni, ta purba evita pa no yega bek, unda Aruba tabata cu ta e nivel di riesgo 4 di e pandemia.
` El a reitera cu tambe otro paisnan ta keda ahusta nan maneho preventivo, entre otro Hulanda. Como autoridad envolvi y concerni, Ronella Croes a subraya cu ATA ta den contacto continuo cu CDC (Centers for Disease Control and Prevention), manera tabata e caso durante henter e pandemia y lo sigui ta e caso tambe, y no mester duda den esey. “E contactonan ta estrecho!” Ronella Croes a acentua.
El a agrega cu mas caso positivo di covid-19 (y su variante omicron) surgi na Aruba, mas pais lo desaconseha pa viaha pa Aruba, y esey kiermen menos turista pa e Isla. Pues, ta masha simple mes!
Manera a indica caba un parti integral di e maneho actual na Aruba, ta pa mas rapido posible mas hende aplica e di tres vacuna (booster), y esnan cu no ta vacuna mester vacuna mas rapido posible.
“E proteccion aki ta limita uso di e capacidad di ICU y HOH basicamente. Di otro banda, mi kier señala cu nos ta hopi bon conciente, cu nos ta den porta di dianan di fiesta, y cu e contagio lo por acelera den e dianan aki. Nos ta fiesta y acelera esaki awo, y carga e consecuencianan negativo na Januari y den e lunanan cu ta sigui, of nos ta mitiga awor, y asegura cu nos ta sigui proteha nos recuperacion economico y nos temporada halto di turismo mas tanto posible, di Januari padilanti. Eseynan ta e preguntanan clave cu tin den e mente di hopi, y nos ta comparti tambe e pensamentonan aki, pues e ta algo cu sigur ta hopi halto riba e agenda di ATA pero tambe di autoridadnan concerni”, CEO di ATA a remarca.
El a enfatiza cu e maneho actual ta wordo revisa tur momento y incluso awo. Pues, no obstante cu no a anuncia cambio aworaki sigur e maneho actual ta wordo evalua continuamente, y lo ahusta si tin mester, Ronella Croes a bolbe reitera.
“Semper e situacion ta keda uno cambiante, y ta wordo discuti awo si por ehemplo, mester ahusta e maneho pa cu e celebracionnan cu ta na caminda. Pues nos kier purba di proteha esey tambe, y e recuperacion economico, pero manera a wordo bisa anteriormente, si mester lo introduci ahustacionnan tambe, entre otro pensando riba e fiestanan cu ta na caminda” Croes a enfatiza.
Ronella Croes a trece dilanti ademas, cu ATA ta hopi conciente cu tin comerciantenan cu tin diferencia di opinion, tin sigur opinionnan y pensamentonan comun, pero tin hopi diferente discusion riba kico mester haci y kico no. Tur ta wordo tuma na cuenta mas tanto posible, pues tur opinion cu bin dilanti y sigur den caso di ATA, cu wordo comunica, tur esakinan ta wordo comparti y evalua debidamente.
“Tin gremionan y sectornan dentro di comercio cu kier flexibilizacion y tin otronan cu kier mas medida. Pues, por mira cu e opinionnan sigur ta diferencia”, CEO di ATA a subraya.
