Na 2026 ta cuarenta aña pasa cu Mike a drenta servicio di Gobierno
*Tres partido ta representa un partido cu a bay ultimo eleccion
*Un hoben ta wordo usa pa laba e imagen di destructor di Aruba
ORANJESTAD(AAN)—Cu un partido politico tin e deber pa refresca su lista di candidatonan, ta un exigencia ora ta papia di democracia.
Sinembargo, e cambio di liderazgo mester ta real y no por ta asina cu un hoben ta wordo uza pa haci hende kere cu tin cambio.
Na 2026 lo ta cuarenta aña pasa, cu Mike Eman a haci su entrada oficial den politica na Aruba na momento cu AVP a bira lider di e coalicion, cu a forma e prome Gobierno di Aruba.
“Ban cas bek” tabata e lema cu a wordo uza pa asina a pidi miembronan di e partido cu a cambia di partido den transcurso di tempo, pa bolbe AVP.
Na momento cu e prome Gobierno a sinta, Mike Eman realmente a bira cara di e Gobierno y Aruba a cera conoci cu e sistema di “coordinador”, cu a reemplaza hasta e sistema di informacion normal di Gobierno te na e momento.
Mike Eman a bira un tipo di relacionista publico den sentido mas amplio di e palabra na e momento cu morto di Betico Croes a percura pa un cambio total den e panorama politico di Aruba.
Cu Mike Eman tabata e principe heredero di e partido, no tabata algo cu mester a pone na discusion aunke cerca vario hoben prominente di e partido, e impresion a wordo crea den transcurso di tempo, cu nan lo ta e futuro dirigente di e partido.
Na 2026 ora celebra 40 aña Status Aparte, lo celebra tambe e tempo cu Mike Eman tin den servicio di Gobierno di Aruba, caminda el a sigui su carera pa na final e mes bira Ministro Presidente como heredero di e partido.
Na 2024, Mike Eman ta presenta na Pueblo di Aruba un hoben cu ta bira e dirigente nobo di e lista di AVP, pero cu no ta lider nobo di AVP cu ta keda bou mando di Mike Eman, cu a exigi Aruba pa no rechaza politica cu bay contra moral di e pais.
Awe exigencia di Mike Eman pa exigi cu Benny Sevinger ta keda den e empleo paga di Pueblo den Parlamento di Aruba, a haci tres partido ta representa e figuranan clave di AVP durante ultimo eleccion.
E ultimo wega di Mike Eman pa presenta un lider cu no ta lider, ta habri wowo pa e realidad di Mike Eman cu semper a keda e ganador den AVP.
Kende Mike Eman ta realmente? Pa motibo di e maneho di Mike, pobreza ta dal Pueblo di Aruba cu mester paga un debe nacional y proyectonan PPP, cu Mike a laga como un peso atras.
Mike ta exigi Pueblo paga salario na Benny Sevinger den Parlamento aunke Huez mes ta atende cu e suma di casi un Miyon cu ta den aire.
For di un Penthouse Mike Eman kier sigui presenta su mes com dirigente di un Pueblo cu el a destrui cu e forma cu el a maneha e pais sin piedad, sin rumbo y a pone bou supervision Hulandes.
Awe un hoben ta wordo presenta na Pueblo como number uno di e lista di AVP, sabiendo cu e no ta number uno pero solamente ta wordo uza dor di Mike Eman, cu for di su Penthouse ta conitinua cu su wega.
For di 1986 practicamente Mike Eman a biba di su servicio na Aruba cu excepcion di un par di aña. For di su penthouse Mike Eman a dirigi un Aruba cu el a cubri cu pobreza.
