Tapaboca mester bira obligatorio paden pero tambe pafo - *Si casonan sigui subi Aruba lo no sali for di e crisis pa awo
ORANJESTAD (AAN): Aruba mester di e gobierno nobo pa di biaha cuminsa tuma medidanan mas stricto pa mitiga e flagelo di e pandemia aki cu tin Aruba den un situacion alarmante. A yega e momento pa e gobierno nobo forma pa caba.
Mester bin cu medidanan mas fuerte pasobra na e momentonan aki Aruba ta riba e lista di paisnan cu mas casonan di Covid-19 per capita.
Hopi hende no kier uza tapaboca. Tapaboca mester ta obligatorio tanto paden di un establecimento como pa pafo.
Por ehempel, ta di elogia cu algun establecimento ya caba a cuminsa tuma nan propio medidanan di entre otro obliga tur hende cu kier drenta den nan lugar pa tin un tapaboca bisti. Tanto trahador como cliente lo mester cumpli, ya cu den caso contrario boet ta cay.
Otronan, na otro paisnan a cuminsa exigi un carchi di vacunacion. Esaki tambe lo por ta un bon medida cu lo por yuda baha e casonan pero tambe limita e privilegionan di esnan cu no kier vacuna.
Mester stop tantisimo fiesta. Hopi hende kier fiesta. Hopi hende kier carnaval. Mester tene cuenta cu tin e grupo cu no kier vacuna y esakinan ta esnan cu ta plamando e virus rond.
Un otro noticia lamentabel ta cu Aruba aworaki a wordo poni riba e lista di "Do not Travel'. CDC di Merca y e Departamento di Estado a bisa bon cla pa no viaha pa Aruba y a pone Aruba den e lista di paisnan den cora, riba e nivel di mas halto pa motibo di e situacion actual di Covid-19.
Di berdad mester bin cu medidanan mas stricto manera esunnan menciona. Tambe ta berdad cu niun hende kier mas medida, pero tin hende cu no kier cumpli cu e protocolnan ni cu e medidanan vigente..
Ya caba e situacion na Hospital ta bayendo for di man. Tin entendi cu te hasta ta mandando algun pashent pa Colombia pa haya tratamento.
Tin un futuro mama den Covid Afdeling y poco dia pasa tambe tabata tin un mucha.
Scol ta den cuminsa y no tur mucha ta vacuna. Muchanan bao di 12 aña no tin vacuna pa nan ainda y no ta conoci ki ora lo autorisa pa vacuna e muchanan den e grupo di edad aki.
Un di tres dosis te ainda no ta posibel tampoco pa esnan cu a vacuna caba y si esaki bira posibel, e lo tuma su tempo pasobra e prome grupo cu lo bin na remarca lo ta esnan cu malesanan cronico y esnan 60 plus.
Kiermen cu Aruba ta sumergi den un situacion basta dificil na e momentonan aki. Si e cantidad di turistanan ta wordo disminui esaki tambe lo nifica menos trabao, menos entrada. Aruba lo bay bek na e situacion di 2020, unda economia a keda paralisa, stanca.
Aruba tabata recuperando basta bon. Tanto den loke ta turismo, den e aspecto di salud, e parti economico como tambe bayendo riba un bon caminda pa e parti financiero.
Pero corda cu si awor, e casonan sigui subi y subi Aruba lo bay bek na 2020 y esey sigur niun hende lo kier. Ningun hende cu a vacuna y cu ta cuidando nan mes y nan prohimo lo desea bay na e situacion ey atrobe. Ban supone cu esnan cu no a vacuna tampoco lo kier perde nan trabao bek.
Ya caba Prome Minister demisionario Evelyn Wever-Croes a confirma cu si e situacion sigui asina, Gobierno lo por sigui atende cu FASE y otro retonan financiero, pero el a enfatisa cu esey lo por sosode pero pa un periodo cortico.
Pesey e mesun recomendacion ta bay atrobe pa tur hende uza nan tapaboca constantemente, tanto pafo como paden di un establecimento. Pero mas cu tur cos, VACUNA AWOR! Tin suficiente vacuna. Esaki ta un privilegio cu Aruba tin y cu ta te hasta gratis.
Mientrastanto, otro paisnan no por a haya ainda ningun dosis di e vacuna.
Aruba ta un isla bendiciona, pero no mester laga e conformismo ni e manera di ta 'nonchalant' prevalece meymey di e crisis aki.
