Ministro Endy Croes:
ORANJESTAD (AAN): Recientemente, Minister di Enseñansa y Deporte Endy Croes a comparti informacion di e reunion semanal cu directora di Departamento di Enseñansa Aruba Señora Anne-Marie Proveyer-Groot, directora suplente Señora Sheila Maduro y Señora Gina Ras-de Kort, unda a trata diferente punto importante relaciona cu enseñansa di Aruba.
Tambe a alinea e maneho di enseñansa den su totalidad den preparacion pa e aña escolar 2024 -2025. Ademas di esaki, a trata diferente proyecto entre otro, e “Honden Project” cu lo worde lansa den luna di september venidero.
Den transcurso di e simannan nos dilanti lo duna mas informacion di e proyecto aki. Tambe a trata e proyecto di Maneho di Idioma, unda cu e alumnonan di klas 1 di scol basico entrante e aña escolar nobo lo siña lesa y skirbi na Papiamento. Ademas di esaki, a trata diferente peticion cu ta pega entre otro, Xavier University School of Medicine Aruba, unda a trata e inkietud aki pa trece un solucion.
Fuera di esaki, a trata e proyecto di digitalisacion, unda cu na inicio di luna di september venidero, DEA tin un reunion cu FUTURA pa trata e parti di digitalisacion y tecnologia pa alinea e vision den totalidad. Tambe a repasa diferente punto di interes di e Doorlichting Rapport menera, e avancenan di e leynan cu ta den proceso di modernisacion. Sr. Luutsen de Vries ta trahando riba e proyecto di modernisacion di nos leynan di enseñansa, cual ta recomendacion 11 di e Doorlichting Rapport.
A repasa e puntonan di interes pa e di dos mita di aña, esta di luna di augustus te cu december 2024 “Sigur por mira atras riba un otro reunion fructifero hunto cu DEA al respecto di e maneho di enseñansa den su totalidad”, Minister Endy Croes a finalisa.
