ORANJESTAD (AAN): Cu e Plan di Termino Largo 2019-2028 ta garantisa financieramente cu den e añanan venidero por haci uzo di Guardacosta di Caribe Hulandes;
DIARIO a compronde cu Guardacosta di Caribe Hulandes ta dispone te cu 2028 di en total € 168 miyon (como 368 miyon Florin), destina pa reemplaso di ekipo.
E cuater Paisnan den Reino ta percura conhuntamente pa cubri e presupuesto financieramente. Esey tin para den e Acuerdonan di gobernacion, cu a keda trata awe den Conseho di Ministronan di Reino hunto cu e Plan di Termino Largo (LTP) 2019-2028 di Guardacosta di Caribe Hulandes.
Minister Ank Bijleveld-Schouten (Defensa) a entrega e documentonan Diabierna na parlamento Hulandes.
Guardacosta di Caribe Hulandes ta existi desde 1996. E ta un acuerdo di cooperacion entre tur e paisnan den Reino. Hulanda (69%), Aruba (11%), Curaçao (16%) y St. Maarten (4%) ta aporta proporcionalmente den e gastonan.
E contribucion di Hulanda ta procedente di e presupuesto di Defensa.
Por yama e acuerdo di cooperacion sin mas exitoso. Como agente di ley maritimo, Guardacosta di Caribe Hulandes ta prueba su mes un conexion indispensabel den e parti Caribense di Reino.
Guardacosta no ta enfoca solamente riba vigilancia di e fronteranan maritimo exterior. E organizacion ta hunga un papel importante tambe den combatimento di crimen cu ta crusa frontera y tin tareanan riba tereno di supervision, search and rescue y combatimento di desaster.
Pa por ehecuta e tareanan aki bon e añanan venidero tambe, mester reemplasa e ekiponan periodicamente. Cu e LTP, Defensa ta duna un bista den esaki. Di e 168 miyon, 159,9 miyon ta bay pa inversionnan relaciona cu reemplaso di ekipo. E montante cu resta ta pa gastonan di explotacion.
Defensa, como administrado di Guardacosta di Caribe Hulandes, ta haya esencial cu desplega operacional di Guardacosta di Caribe Hulandes ta keda garantisa.
Sigur den e epoca actual, den cua narcocriminalidad y clima extremo ta aumentando. Banda di esey e region tin di haber cu un Venezuela instabil, contrabanda di hende y problematica di migracion.
