ORANJESTAD (AAN): Informe di Curaçao ta indica cu recien a tuma luga un reunion di grupo di trabao meteorologia pa aviacion den Reino.
Despues di restructuracion den Reino na 2010 a yega e momento pa revisa e maneho y leynan relaciona cu aviacion di e paisnan den Reino cu e ultimo desaroyonan di Organizacion Internacional di Aviacion Civil (ICAO).
Den e cuadro aki a lanta diferente grupo di trabao pa trata esaki den cual maneho y leynan relaciona cu e servicionan di meteorologia pa aviacion tambe ta parti di esaki.
Servisio Meteorologiko di Kòrsou a worde encarga pa presidi e grupo di trabao di e paisnan den Reino. Durante e tres dianan ey, pues di 9 te cu 11 di April, a delibera riba formanan pa harmoniza e leynan existente na Aruba, Curaçao, St. Maarten y Hulanda (BES) pa asina facilita e implementacion di cambionan cu ICAO ta impone riba tur su miembronan. Den un presentacion di Meteo, señora Oswanij Ospino a presenta un estudio di tur normanan internacional cu Curaçao tin implementa den leynan nacional di meteorologia. Ta bon pa informa cu tarea di Servicio Meteorologico den e cuadro aki ta pa duna servicio na aviacion cu e meta pa aporta na e seguridad di aviacion y tambe hisa eficiencia di aviacion.
E resultado di e prome reunion di e grupo di trabao tabata, mirando e beneficionan pa sigui cu e proceso pa uniforma e leynan nacional, teniendo cuenta cu e diferente funcion di e Servicio Meteorologico di Aruba, Curaçao, y St. Maarten y di Hulanda pa Bonaire, St Eustatius y Saba. Por mira cu satisfaccion e trabao haci durante e tres dianan segun señor Martis, director di Servisio Meteorologiko Kòrsou kende a presidi e reunion. Riba e potret por mira e delegacionnan di Aruba, St Maarten, Curaçao y Hulanda dilanti e weather-radar na Sero Mahuma na Curaçao.
.
